Qazaqstan Ulttyq Banki Qazaqstan Respýblıkasyndaǵy ortalyq banktiń sıfrlyq valútasyn (eskertpe: Central bank digital currency – CBDC) engizý týraly máseleni zertteýdi qolǵa aldy, dep habarlaıdy Qamshy.kz aqparat agenttigi Qazaqstan Ulttyq Banktiń baspasóz qyzmetine silteme jasap. 

Halyqaralyq esep aıyrysý banki júrgizgen saýalnamanyń derekteri boıynsha, 2020 jyldyń basynda zertteý júrgizýden bastap, pılottyq jobalardy iske asyrýǵa deıin CBDC boıynsha jumysqa suralǵan ortalyq bankterdiń 80%-y tartylǵan.

Álemdegi kóptegen ortalyq bankter úshin tólem júıelerin sıfrlyq transformasıalaý óte ózekti sanalady. Qazaqstan Ulttyq Banki basqa elderdiń 28 ortalyq bankimen birge sıfrlyq valútalar boıynsha negizgi halyqaralyq zertteý tobynyń jumysyna qatysady.

Ulttyq Bank mamandary Halyqaralyq esep aıyrysý bankimen jáne Halyqaralyq valúta qorymen birlese otyryp, sıfrlyq valútany retteý tásilderin zerdeleı bastady.

Sonymen qatar Qazaqstan Ulttyq Banki Qytaı Halyq Respýblıkasynda, Ońtústik-SHyǵys Azıanyń birqatar elinde, Kanadada, Sıngapýrda jáne Eýropalyq Odaqta sıfrlyq valútany engizý jónindegi pılottyq jobalarda baqylaýshy bolady.

Qazir ár túrli tehnologıalyq ınfraqurylym men retteý tásilderi eskeriletin Qazaqstan Respýblıkasynda sıfrlyq valútany engizýdiń ár túrli senarıine arnalǵan baıandama ázirlenip jatyr. Baıandama 2021 jyldyń ekinshi jartysynda jarıalanady.

Budan keıin qujat múddeli memlekettik organdarmen, halyqaralyq qarjy uıymdarymen, naryq qatysýshylarymen jáne sarapshylarmen talqyǵa túsip, sodan keıin Qazaqstan Respýblıkasynda ortalyq banktiń sıfrlyq valútasyn kezeń-kezeńimen engizý boıynsha pılottyq joba iske asyrylady.

CBDC tehnologıasy el aýmaǵynda tólemderdiń tıimdiligi men qoljetimdiligin odan ári jetildirý úshin qolma-qol aqshamen jáne qolma-qol aqshasyz tólemderdiń artyqshylyqtaryn biriktirýge tıis. Bul rette sıfrlyq valúta tólem ınfraqurylymyn ártaraptandyrýǵa arnalǵan. Pılottyq kezeńniń qorytyndysy boıynsha CBDC Qytaıda, Japonıada, Kanadada jáne Eýropalyq Odaq elderinde testileýden ótýde. CBDC resmı deńgeıde engizý Reseı Federasıasynda qarastyrylyp jatyr.