Qazaqstanda tirkelgen 6 saıası partıanyń Jalpyulttyq sosıal demokratıalyq partıadan basqasy 10 qańtarǵa belgilengen parlament májilisiniń saılaýyna kandıdattar tizimin jarıalady. Aqyn, 2004-2007 jyldary májilis depýtaty bolǵan Muhtar Shahanov aldaǵy saılaý týraly ne oılaıtynyn aıtty.

Onyń sózinshe, qazirgi tańda ult múddesi úshin dep júrgen depýtat joq.

– Qazir tek "jepýtattar" ǵana bar. Partıalar qoldan jasalǵan. Olardyń eshbirine sengim kelmeıdi. Qazirgi kezde eń qurmetti adamdar "yrbıgúlder" men "jyrbıbaılar" (ánshiler – red) bolyp tur. Erteden keshke deıin án salady. Kezinde Gıtlerden "shyǵystaǵy elderge qandaı saıasat qoldanasyń" dep suraǵan ǵoı. Gıtler sonda "olarǵa erteden keshke deıin jeńil ánder, jeńil mýzyka qoıa berý qajet. Olarǵa oılanýǵa, kitap oqýǵa múmkindik bermeý kerek. Óıtkeni adam rýhanı jaǵynan neǵurlym saıaz bolǵan saıyn, ózin soǵyrlym baqyttyraq sezinedi" degen. Qazir búkil álemde Gıtlerdiń osy saıasaty alǵa shyqty. Sondyqtan qazirgi kezeńde shyndyq joq. Shyndyǵyn joǵaltyp alsa, aqty aq, qarany qara dep aıtýdan qalsa, sózi basqa, isi basqa, ulttyq, ǵalamdyq múddege tamyr jibere almasa, pendeligi tek ózin ǵana emes, qoǵamdy da aldasa, ondaı aqynnyń da, ǵalymnyń da, saıasatkerdiń de mazmuny, dańqy dalbasa, – dedi aqyn.