Taýly Qarabaqta sońǵy 30 jylda birinshi ret mınalardy aýqymdy túrde tazartý jumystary júrgizilip jatyr. Reseı áskerı ınjenerleri Qarabaqtaǵy alǵashqy qaqtyǵys kezinen saqtalǵan, biraq óltirý qabiletin joǵaltpaǵan snarádtardy tapqan. Bul týraly Ázerbaıjan Qorǵanys mınıstrligine silteme jasaı otyryp,  ntv.ru saıty habarlady.

"Ortalyq mamandary Shýsha-Lısogorskıı jolynyń shamamen úsh shaqyrymdyq bóliginde ınjenerlik barlaý jáne jarylǵysh zattardy tazartý jumystaryn júrgizdi. Táýligine 200-den astam jarylǵysh zattyń kúshin joıyp jatyr. Taýly Qarabaqta mınalardy tazartý kezinde áskerıler barlyǵy 24 gektardan astam aýmaqty, segiz shaqyrymnan astam joldy tazartyp, 750 jarylǵysh zatty taýyp, kúshin joıdy" delingen mınıstrliktiń habarlamasynda.

Qorǵanys mınıstrligi jarylǵysh zattardy IMP-S2 mına detektorlary jáne INVU-3M sıaqty zamanaýı quraldarymen tabatynyn basa aıtty. Taýly aýyldarda, joldardyń boıynda, betkeılerde, zırattardan burynnan joǵalǵan mınalar, snarádtar, kartalar tabylǵan.

Buǵan deıin Qarabaq qaqtyǵysynyń aıaqtalǵany týraly habarlanǵan. Armenıa premer-mınıstri Nıkol Pashınán Ázerbaıjan prezıdenti Ilham Álıev jáne Reseı prezıdenti Vladımır Pýtın Taýly Qarabaqta áskerı áreketterdi toqtatý týraly kelisimge qol qoıdy. Kelisimge sáıkes, Reseıdiń bitimgerlik kúshteri Taýly Qarabaqqa kirgizilgen.  Osylaısha úsh eldiń arasynda bolǵan kelisim boıynsha 3 aýdan (Lachın, Agdam, Kelbadjar) Ázerbaıjanǵa qaıtarylyp, basqynshy ásker aımaqtan shyǵarylady. Bul kelisimnen keıin Armenıa astanasy Erevanda premer-mınıstrge qarsy mıtıńter ótip, sodan beri halyq Pashınánnyń otstavkaǵa ketýin talap etip keledi.

Ázerbaıjan prezıdenti Ilham Alıev bul qujattyń Ázerbaıjanǵa tıimdi ekenin aıtqan. Onyń aıtýynsha, qazir áskerı kezeń aıaqtaldy jáne saıası máselelerge kóshýge bolady.