Búgin - Qazaqstan Respýblıkasynyń Táýelsizdik kúni.

Bul ataýly kún 1991 jylǵy jeltoqsannyń 16-synda Qazaqstan Respýblıkasynyń Prezıdenti N.Á.Nazarbaev qol qoıǵan «Qazaqstan Respýblıkasynyń memlekettik táýelsizdigi týraly» jáne 25.06.2008 j. jáne 22.04.2009 jylǵy Zańdarymen ózgertýler engizilgen 2001 jylǵy jeltoqsannyń 13-de «Qazaqstan Respýblıkasyndaǵy merekeler týraly» Qazaqstan Respýblıkasy zańdaryna sáıkes atap ótiledi. Respýblıka óz betinshe ishki-syrtqy saıasatty júrgizetin, óz aýmaǵynda bılikti tolyq ıelengen táýelsiz demokratıalyq jáne quqyqtyq memleket mártebesine ıe boldy. Demokratıalaný jolyndaǵy baǵyt Qazaqstandy egemen, táýelsiz memleket retinde, qazaq halqy ulttyq tilin, mádenıetin, dástúrin saqtap, óz bastamalary men erekshelikterin jańǵyrta alatyndyǵyn jarıa etýge múmkindik berdi.

Minekı, el bolyp, terezemiz basqa jurtpen teń bolyp, halyqaralyq deńgeıde tolyqqandy moıyndalǵan memleket retinde ómir súrip jatqanymyzǵa da 22 jyldyń júzi bolyp otyr. Tarıh úshin sonshalyqty zor kezeń bolmaǵanymen, osy jyldar ishinde ǵasyrlarǵa bergisiz qyrýar ister atqaryldy. Ekonomıkalyq-áleýmettik, saıası, qaýipsizdik máselelerinde, onyń ishinde jahandyq. óńirlik problemalarǵa qatysty óz aldyna derbes sheshim qabyldaı alatyn, óz ustanymyn pash ete alatyn egemen memleket bola alatynymyzdy barlyq qyrynan aıqyndap, moıyndattyq.

«Jylǵa bergisiz kúnder, ǵasyrǵa bergisiz jyldar bolady. Biz úshin ótken 22 jyl dál osyndaı kezeń. Biz úırenetin ulttan, úıretetin ultqa, jyǵýǵa emes, jyǵylmaýǵa umtylatyn elge aınaldyq. Búgingi isimizge qarap erteńgi urpaq bizge baǵa beretin bolady. Táýelsizdik - jasampaz halqymyzǵa sarqylmas qýat beretin, kózine nur, kóńiline shýaq quıatyn káýsar bulaǵymyz. Biz kemeńgerligi men kóregendigi, birligi men biregeı maqsatkerligi qatar órilgen Máńgilik Elimizdi maqtan tutamyz. Táýelsizdiktiń týyn tigý baqyty men ony baıandy etip, nyǵaıtý mindeti bizdiń mańdaıymyzǵa jazyldy. Biz Máńgilik Eldiń irgetasyn qaladyq. Máńgilik Eldiń júregine aınalǵan máńgilik Astanamyzdy turǵyzdyq. Máńgilik myzǵymas ekonomıka qalyptastyryp, Máńgilik óshpes jylnama jazdyq. Máńgilik bolashaqqa jol saldyq. Osynyń barlyǵy táýelsizdigimizdiń tartýy, azattyǵymyzdyń asyl qazynasy. Táýelsizdigimiz tuǵyrly, eldigimiz ǵumyrly bolsyn! Máńgilik Elimizdiń kelbeti sándi, eńbegi mándi bolsyn! Kúlli halqymyzǵa berekeli birlik pen baıandy tirlik tileımin!»,-dedi Elbasy Nursultan Nazarbaev Táýelsizdik kúnine arnalǵan saltanatty jıynda.

inform.kz