Oralda jańa jyldy bes adamnan aspaıtyn top bolyp qarsy alýǵa ruqsat etti. Bul týraly azh.kz saıty habarlady. 

BQO sanıtarlyq-epıdemıologıalyq baqylaý departamentiniń basshysy Muqaǵalı Aryspaev "Moı gorod" basylymyna is-sharalardy, otbasylyq merekelerdi, onyń ishinde jańa jyldyq korporatıvtik keshter men jıyndardy meıramhanalarda, kafelerde jáne banket zaldarynda ótkizýge tyıym salynatyndyǵyn basa aıtty.

– Úıde bes adamǵa deıin jınala alady, oǵan shekteý joq. Bes adamnan kóp, 10, 20 adam bolsa, bul buqaralyq is-shara retinde qarastyrylatyn bolady. Eger polısıa nemese monıtorıńtik toptardan aryz tússe, onda olar jaýapqa tartylady. Jeke tulǵalarǵa salynatyn bul rettegi aıyppul shamamen 83 myń teńgeni quraıdy, eger ol ony bir apta ishinde tólese, onda 41 myń teńge bolady. Qazir bizdiń óńir "jasyl" aımaqta, biraq eger biz "sary" nemese "qyzyl" aımaqqa enip ketsek, onda shekteý sharalaryn kúsheıtýge týra keledi, – dedi ol.