AQSH-tyń Azyq-túlik jáne dári-dármektermen qamtamasyz etý basqarmasy Pfizer-BioNTech koronavırýs vaksınasyn qoldanýǵa ruqsat berdi.

Agenttik muny pandemıaǵa qarsy "mańyzdy oqıǵa" dep málimdedi.

Koronavırýstan 95%-ǵa deıin qorǵaıdy delingen vaksınany amerıkalyq basqarma qaýipsiz ári tıimdi dep tapty.

AQSH prezıdenti Donald Tramp alǵashqy vaksınasıa "24 saǵatqa jetpeıtin ýaqytta" jasalatynyn aıtty.

– Búgin bizdiń ulttyq medısına ǵajaıypqa qol jetkizdi. Biz tek toǵyz aıda qaýipsiz jáne tıimdi vaksınany jasadyq, – dedi Tramp

Pfizer vaksınasy qazirdiń ózinde Ulybrıtanıada, Kanadada, Bahreınde jáne Saýd Arabıasynda zańdy túrde maquldanǵan. Osy elder sıaqty, AQSH egde jastaǵy turǵyndarǵa, medısınalyq qyzmetkerler men erekshe jaǵdaılar brıgadasyna vaksınanyń alǵashqy dozalaryn beredi.

AQSH-ta qarasha aıynan bastap koronavırýs boıynsha ólim kúrt ósýde. Sársenbide elde 3000-nan astam ólim tirkeldi. Bul – álemdegi eń joǵary kórsetkish.