Reseıdiń memlekettik dýma depýtaty Evgenıı Fedorov "Belrýsınfo" arnasyna bergen suhbatynda "Orynbor da, Qyzylorda, Almaty da, Qazaqstan da Reseıdiń bir sýbektisi boldy" degen málimdeme jasady. Jýrnalıs depýtatqa "Reseı Qazaqstanǵa "jalǵa bergen" jer týraly aıtqanyńyzǵa Qazaqstan azamattary narazylyq bildirip, biraz daý boldy. Osyǵan pikirińizdi bildirińizshi. Jer týraly aıtqanda neni meńzedińiz?" degen suraq qoıady.

–  Olar ózderiniń zańdy dálelderi joq ekenin jaqsy biledi. Sol úshin bos aıqaıǵa salyp jatyr. Al men Qazaqstannyń Reseı Federasıasynan jer alyp jatqany týraly qolhat usyndym. Ol jerdi Qazaqstan Keńes odaǵynyń quramynda bolǵan ýaqytqa deıin ıemdene alady, – dedi Fedorov .

Onyń aıtýynsha, Keńes odaǵy kezinde berilgen jerdiń úsh sanaty bolǵan. Birinshisi, odaqqa kirgen elderdiń ózinde bolǵan aımaqtary. Ekinshisi, respýblıkalarǵa odaqtyń bergen jeri. Eger sol elder odaqtan shyǵatyn bolsa, jerdi qaıtaryp berýge mindetti. Úshinshisi, odaqqa kirgen respýblıkalardyń ózge odaqtas respýblıkalardan jalǵa alǵan jerleri. Bul pýnkt, depýttattyń aıtýynsha, eń qatań túri eken.

– Qazaqstan jer sanaty boıynsha atalǵan úshinshisine kiredi. Bul el – Keńes odaǵyndaǵy ózge elderden jerdi shartty túrde jalǵa alǵan memleket. Eger odaq ydyrasa, ol jerlerdiń qaıtarymy bolýy kerek. Keńes odaǵyndaǵy kelisim-shartta osylaı jazylǵan, – dedi ol.

Fedorov "Qazaqstan aýmaǵy – Reseı tarapynan jasalǵan syı" degen pikirge senator Muhtar Qul-Muhammedtiń bergen jaýabyn "orynsyz keleketý" dep baǵalady.

– Biz emosıaǵa berilip jatqan joqpyz. Qazaqstandaǵy sheneýnikter menimen sóılespeıdi. Sebebi men olar sıaqty emes, naqty dálel keltiremin. 

Jalpy Qazaqstan zańsyz jáne ýaqytsha moıyndalǵan deýge bolatyn shyǵar. Sebebi, KSRO tarady degen naqty birde-bir qujat joq.  Eger zańǵa súıensek, 1922 jyly Qazaqstan degen bolǵan joq, onyń 1 mm jeri de bolmaǵan. Orynbor da, Qyzylorda, Almaty da, Qazaqstannyń basqa qalalary Reseıdiń bir sýbektisi boldy, – dedi dýma depýtaty qazaqstandyqtardy Reseı azamaty bolýǵa shaqyryp.