«Nur Otan»-nyń Respýblıkalyq saılaýaldy shtaby Qyzylorda oblysyna keldi. Olar bilim jáne densaýlyq saqtaý salasynyń qyzmetkerlerimen, aýyl sharýashylyq kásiporyndarynyń ujymymen, jastarmen jáne basqa da azamattarmen júzdesip, uzyn sany 15-ke jýyq kezdesý ótkizdi.

Sonymen, óńirdegi kásipker áıeldermen kezdesý barysynda bıleýshi partıanyń taıaýdaǵy 5 jylǵa arnalǵan saılaýaldy bastamalary áńgime arqaýyna aınaldy.

«Elbasy, partıa Lıderi Nursultan Nazarbaevtyń tapsyrmasy boıynsha atqarýshy, ókildi, sot organdary men kvazımemlekettik sektorda basshylyqtaǵy áıelderdiń úlesin 30%-ke deıin ulǵaıtýdy nıet etip otyrmyz. Sonymen qatar Áıelder kásipkerligin damytý ortalyǵyn qurý, áıelderdi jeńildetilgen nesıemen jáne granttarmen qamtamasyz etý sekildi ister de josparlanyp jatyr», - dep atap ótti Respýblıkalyq saılaýaldy shtab jetekshisi Baýyrjan Baıbek.

Onyń aıtýynsha, elimizdiń óńirleri, qalalary men aýdandary boıynsha jumyspen qamtý, bazalyq áleýmettik qyzmetter men ártúrli memlekettik qoldaý sharalaryna qoljetimdilik máselelerin qamtıtyn Genderlik qajettilikter kartasy ázirlenedi.

Jalpy, jeke bıznesin ashý úshin 50 myń azamatqa shaǵyn nesıe beriledi, onyń ishinde jalpy somasy 250 mlrd. teńge bolatyn nesıe 42 myń aýyldyq azamatqa baǵyttalady.

Úkimettik emes uıymdar ókilderimen kezdesýde eldegi demokratıanyń óristeýine jol ashatyn jaýapty azamattyq qoǵamdy damytý máseleleri kóterilip, osy baǵyttaǵy birqatar oılar ortaǵa salyndy.

Partıa baspasóz qyzmetiniń habarlaýynsha, «Nur Otan» «Jaýapty azamat – jaýapty qoǵam – jaýapty memleket» formýlasy boıynsha jalpyǵa ortaq jaýapkershilik tujyrymdamasyn usynyp otyr.

Osyǵan baılanysty nurotandyqtar eldegi ózekti máselelerdi birlese sheshý men memleketti damytý isine azamattyq belsendilerdi qarqyndy túrde aralastyrýdy josparlaýda.

Bul jumystar júıeli júrýi úshin Jergilikti ózin-ózi basqarý tujyrymdamasy ázirlenetin bolady. Atalǵan qujatta aýyl ákimderin tikeleı saılaý, olardyń saılaýshylar aldyndaǵy eseptiligi, «halyq qatysatyn» búdjetti endirý, jergilikti salyq pen tólemder stavkalaryn ózgertý quqyǵy, jergilikti ózin-ózi basqarýdy azamattyq qadaǵalaý jáne taǵy da basqa máseleler qamtylady.

«Biz elimizde saıası dıalog jasaý mádenıetin júıeli túrde damytatyn bolamyz. Bul úshin «Qoǵamdyq baqylaý týraly» Zań qabyldaý josparlanýda. Bul zańda qoǵamdyq saraptama júrgizý men baqylaý tártibi, azamattyq bastamalar men onlaın-petısıalarǵa jol ashý sekildi tetikter kózdeledi», - dedi partıa Tóraǵasynyń birinshi orynbasary.

Partıa azamattyq qoǵammen birlese otyryp, ekologıalyq máselelerdi sheshý, tabıǵatqa aıalaı qaraý mádenıetin kúsheıtý jaıyna jiti mán berip, oǵan mańyzdy mindetteriniń biri retinde basymdyq berip otyr.

Jalpy, óńir halqymen kezdesýde aýyz sýmen qamtamasyz etý, turmysy tómen otbasylarǵa qoldaý kórsetý, agrarlyq salany damytý jaıy da kóterilip, jan-jaqty talqylandy.

Osy jaıttar eskerile otyryp, «Nur Otan»-nyń óńirlik saılaýaldy baǵdarlamasy aıasynda 20-dan astam eldi mekenniń 7 myńdaı turǵynyn sapaly aýyz sýmen qamtamasyz etý, jańadan 27 densaýlyq saqtaý nysanyn salý, oblysta 67 myńnan astam jumys ornyn ashý josparlanýda. Óńirdiń turmys-tirshiliginde erekshe mańyzy bar Syrdarıa ózeniniń arnasyn retteý jáne Aral teńiziniń soltústik bóligin saqtaý jobasyn iske asyrý da ary qaraı óz jalǵasyn tabady.

«Nur Otan» partıasynyń saılaý qory qarajaty esebinen tólendi.