Memleket basshysy Qasym-Jomart Toqaev "Qazaqstan Respýblıkasy men Azıa ınfraqurylymdyq ınvestısıalar banki arasyndaǵy "qaryz týraly" kelisimdi (COVID-19-ǵa qarsy kúres jónindegi belsendi sharalar men shyǵystardy qoldaý baǵdarlamasy) ratıfıkasıalaý týraly" Qazaqstan Respýblıkasynyń zańyna qol qoıdy. Bul týraly akorda.kz saıty habarlady. 

Zańnyń mátini aldaǵy ýaqytta baspasózde jarıalanady. 

Buǵan deıin senat koronavırýspen kúresý jáne Qazaqstan ekonomıkasyn qalpyna keltirý úshin Azıa damý banki men Azıanyń ınfraqurylymdyq ınvestısıalar bankinen 1,5 mıllıard eýroǵa nesıe alý týraly zań qabyldaǵan.

908 mıllıon eýroǵa alǵashqy nesıeni Azıa damý banki berýi kerek. 454 mıllıon eýro kólemindegi nesıeniń bir bóligin Qazaqstan úsh jyldyq jeńildik kezeńimen qosa 10 jyl ishinde tóleýi kerek. Qalǵan 454 mıllıon eýro úsh jyldyq jeńildik kezeńin qosqanda bes jylǵa beriledi.

Azıalyq ınfraqurylymdyq ınvestısıalar bankimen ekinshi kelisimge 661 mıllıon eýroǵa qol qoıyldy. Nesıe úsh jyldyq jeńildikti kezeńdi qosa alǵanda, 10 jyl merzimimen beriledi.