Eriktiler – bizdiń zamanymyzdyń naǵyz batyrlary. Olar ózderin qoǵamǵa jany ashıtyn azamattar, jańashyldar jáne memlekettiń senimdi seriktesteri retinde kórsetip, halyqtyń osal toptarymen jumys jasaýda. «Jesirin qańǵytpaǵan, jetimin jylatpaǵan» darhan eldiń qanyna qaıyrymdyq jasaý isi bite qaınasqan. Qazaq qashanda súringenge demeý, súıengenge tireý bolǵan. Bul ásili halyqtyń tektiligimen tikeleı baılanysty bolsa kerek. Atamzamannan baýyryn jurtta qaldyryp, jutqa tastamaǵan babalar ustanymy búginge deıin jalǵasyp keledi. Zamana ózgersede adamzat kisilik kelbetin joǵalta qoımady. Onysy elim degen erlerdiń «ár qazaq - meniń jalǵyzym» degen ustanymdy ustanyp, qysyl-taıań sátte qol ushyn sozǵandyǵynan kórinis tapsa kerekti.

Tipti el Prezıdenti Qasym-Jomart Toqaevta bir-birimizge degen baýyrmaldyq seziminiń otyn óshirmeıik dep, volonterlik qozǵalysty damytý maqsatynda «2020 jyl – Volonterlar jyly» dep jarıalady.

Atalǵan bastamany qoldaǵandar sany esepsiz boldy. Oǵan dálel, óńirdiń ár túkpirinen ózgeniń muń-muqtajyna beı-jaı qaramaıtyn azamattardyń bas kóterýi. Jasy men jasamysy kúsh biriktirip, arnaıy qaıyrymdylyq qoryn quryp, keıbiri jekeleı qol ushyn sozyp, kómektesip jatty.  San qıly taǵdyrlarǵa kóz jumyp qaraý múmkin emestigin túsingen erek jandar janyn saldy, baryn aıamady. Osylaısha olar teńizdiń tamshysyndaı bolsada óz úlesterin qosty.

"Ǵulama Abaı "Adamzattyń barlyǵyn súı baýyrym "dep barshamyzǵa ósıet qaldyrdy. Volonter bolý - júrektiń isi, ıaǵnı shynaıy nıettiń kórinisi. Sender qolǵa alǵan jumystardyń barlyǵy eriktiliktiń jarqyn úlgisi bolaryna kúmánim joq. Men volonter jyly aıasynda eń aldymen elimizdiń jastaryna zor senim artamyn. Árdaıym abyroıly, ári tabysty bolyńyzdar", - degen edi Qasym-Jomart Kemeluly.

Almaty oblysynda da nebir volonterlik qozǵalystar bolyp,shyn muqtajadarǵa materıaldyq jáne moraldyq turǵydan qoldaý kórsetildi.

Judyryqtaı júrekterine bar alashty syıǵyzǵan márt azamattar bul isti ataq, dańq úshin jasamady. Olar tek, arhardaı aýyp júrgen adam balasynyń arqa súıýine múmkindik berdi. Degenmen, oblys basshylyǵy mundaı keń júrektiń ıelerin eskerýsiz qaldyrmaýdy jón kórip, atqarǵan isterine qaraı laıyqty qurmetin kórsetti.

Osyǵan oraı, Jetisý óńirinde  Elbasy N.Á. Nazarbaevtyń «Bolashaqqa baǵdar: rýhanı jańǵyrý» baǵdarlamasynyń pragmatızm men básekege qabilettilik baǵyttaryn jáne  Memleket basshysynyń jarlyǵyn iske asyrý, erikti qyzmetke azamattardy, ásirese, jastardy tarta otyryp, belsendi ómirlik ustanymyn qalyptastyrýdy nysanaǵa ala otyryp,  eriktiler arasynda oblys ákiminiń «ASYL JÚREK» syılyǵy  saltanatty túrde tabys etildi. Sharada  8 atalym boıynsha adal jandar ardaqtaldy.

«ASYL JÚREK» premıasynda «Murager» Etno volonterlik  nomınasıasy Aleksandr Son laıyq dep tanyldy. Al, áleýmettik erikti retinde «Jan jylýy» atalymynan Amangeldi Tolamısov marapatqa ıe boldy. Adamzattan bólek, tabıǵat anaǵada qurmetpen qaraý úlkýen jaýapkershilik pen asa meıirimdiliktiń arqasynda oryn alady. Bul rette Eko volonterlik jeńimpazy bolyp  Sergeı Tandeev tańdaldy.

Janýarlarǵa qamqorlyq kórsetkenderde tuǵyrly tuǵyrdan kórindi.  –Veronıka Gýzenko «Haıýanattar qorǵaýshysy» ZOO volonterlik atalymyn jeńip aldy. Eriktilerdiń ishinde «Kózsiz erlik» nomınasıasyn  – Oksana Oralbaıqyzy qanjyǵasyna baılady. « Bilgenimen bólisken» Onlaın volonterlik jeńimpazy Alısher Ermekuly bolsa, «Shıpager» medısına eriktiligi júldesi Almabek Batkalbekovke buıyrdy. « Halyq janashyry» dep  Hýmar Halysuly tanyldy. Aıta keteıik bul dodaǵa 100 ge jýyq ótinip kelip túsken. Arnaıy syılyqqa ıe bolǵandar, júzden júırik, myńnan tulpar shyqqandar.

Shara tek, jeńimpazdardy marapattaýmen shektelmedi. Qaıyrymdy jandar ádetterinen jańylmaı taǵy bir otbasyny qýanyshqa keneltti. Olar 5 balanyń anasy, Aqmaral Naýryzbekova baspana kiltin tabys etti. Úıdiń kiltin  "Óner qyrandary" ázil-syqaq teatrynyń akteri Madıar Serikbaev berdi.

Jalǵyzbasty ananyń qonys toıyn toılaýy "1000 teńgege baspana" jobasynyń aıasynda júzege asyp otyr. Bul bıylǵy jyly "Hareket" qory tapsyrǵan 366 -shy úı.

"5 qyz tárbıelep otyrmyn. Joldasym jol apatynan qaıtys bolǵan. 2016 jylda beri úı kezeginde turmyn. Búgin araǵa 4 jyl salyp úıli boldym. Baspanany ózim turatyn Kóksý aýdany, Baqtybaı aýylynan alyp berdi.  Erikti Amangeldi Ǵabdylkárimulyna, Madıar Serikbaevqa jáne "Hareket" qaıyrymdylyq qorynyń basshysy Gúlmıra Muqanqyzyna alǵysym sheksiz",- dedi Aqmaral  Nurtazaqyzy.

Sondaı-aq, marapattaý barysynda «Asyl Júrek: Kózsiz erlik» nomınasıasynyń jeńimpazy, «Lider.kz» eriktiler klýbynyń múshesi Oksana Ámirǵalıeva óziniń aqshalaı sertıfıkatyn kóp jyldar boıy muqtaj otbasylarǵa kómektesip, iz - túzsiz joǵalǵan adamdardy izdestirýge qatysqan Úshtóbe qalasynyń eriktisi – áriptesi Ekaterına Seredınaǵa berdi. Sebebi, tek shetelde ǵana júzege asyrylatyn Ekaterınanyń emdelýine 5 myń eýro qajet.

Erikti bolý – erlik. Qoǵamnyń ketigin jamaýǵa judyryqtaı jumyla qareket etken atpaldaı azamattardyń eńbegi eren. Beıbin kúnde bir-birimizge degen meıirim sáýlesi sónbesin.