Bıyl Qazaqstan Táýelsizdiginiń 30 jyldyǵy men Elbasynyń tikeleı qoldaýymen qolǵa alynǵan «Ózińnen basta» áleýmettik jobasynyń 10 jyldyǵy tuspa-tus kelip otyr. Osy jyldar ishinde jobaǵa demeýshiler men mesenattar jalpy alǵanda 1,4 mlrd.teńgege jýyq qarajat bólip, sonyń arqasynda biz álemdik 36 kórkem jáne anımasıalyq fılmderdi aǵylshyn tilinen tikeleı qazaq tiline dýblájdadyq. Osy oraıda aıta keterligi, munyń barlyǵy Mádenıet mınıstrliginiń eshqandaı qoldaýynsyz júzege asty. Balalar úshin memlekettik tilde sapaly ári básekege qabiletti kontent jasaýǵa jaýapty ýákiletti organ bolashaqtyqtardyń qoǵamdyq bastamasyn odan ári jalǵastyrady dep oılaımyn», - dedi «Nur Otan» partıasy Tóraǵasynyń birinshi orynbasary jáne «Bolashaq» qory qamqorshylyq keńesiniń qurmetti múshesi Baýyrjan Baıbek.

Partıa baspasóz qyzmetiniń habarlaýynsha, «Nur Otan» Mádenıet mınıstrliginen osy baǵytta tıisti jumysty talap etetin bolady.

Jalpy, óziniń saılaýaldy ýádelerin iske asyrý aıasynda bıleýshi partıa memlekettik tildiń barlyq salada keńinen qoldanylýyna, qazaq tilinde oqytatyn mektepter men balabaqshalardyń kóbeıýine yqpal etýdi, sondaı-aq, dástúrli mádenıet pen ulttyq sport túrlerin qoldaýdy odan ári jalǵastyrady.

«Bolashaq» qamqorshylyq keńesiniń tóraıymy Dınara Shaıjúnisova atap ótkendeı, qor burynǵysynsha kınokartınalardy memlekettik tilde teń usyný máselesimen belsendi aınalysady.

«Ýaqyt óte kele «Jan» sheteldik kınonyń qazaq tilindegi klasıkasyna aınalady dep oılaımyn. Sonymen qatar, qazaqstandyqtar úshin qazaq tilindegi kınoǵa teń qoljetimdiliktiń ózektiligi saqtalýda. Ýákiletti organdar tıisti sharalar qabyldaýy úshin biz bul máseleni barlyq alańdarda odan ári kótere beremiz», - dep atap ótti ol.

Aıta keteıik, «Ózińnen basta» jobasyn júzege asyrý barysynda «Muzdy ólke-2», «Kek alýshylar: Áltron dáýiri», «Batyl júrek», «Koko qupıasy», «Moana», «Malefısenta», «Aladdın» sıaqty jáne t.b. kartınalar qazaq tiline dýblájdaldy.

Jobanyń arqasynda 100-den astam otandyq akter «Walt Disney Pictures»-niń daýystyq bazasyna endi. Qazaq tili túrik tilinen keıingi dýblájdaǵy ekinshi túrki tili jáne «Walt Disney» kompanıasynyń tarıhyndaǵy 39-shy til boldy.

Joba tarıhynda alǵash ret «Jan» fılmine dýbláj jasaýǵa kastıngke tek bir ǵana Nur-sultan qalasynyń ózinen 20 akter qatysty. Degenmen, kásibı akterlik quram irikteldi. Mysaly, basty keıipker Djo Gardnerdi jobaǵa kópten beri qatysyp júrgen talantty akter Dáýren Serǵazın dybystady. Buǵan deıin onyń daýysymen «Alladın» fılmindegi Jyn, «Arystan patsha» fılmindegi sýrıkat Tımon jáne Dısneı stýdıasynyń basqa da tanymal keıipkerleri sóılegen edi. Sonymen qatar, dýblájǵa Danıar Svanqulov, Merýert Ermekbaeva, teatr jáne kıno ártisi Maıra Omar qatysty.

Tıtrdegi «Ómir ǵajap» ánin Mona Songz degen atpen tanymal qazaqstandyq oryndaýshy Manarbek Jumataı oryndady.

Baspasóz qyzmetiniń habarlaýynsha, atalǵan anımasıalyq fılmdi jaqyn arada Internet jelisinde kórýge bolady.