Búgin Májilis Spıkeri Nurlan Nyǵmatýlınniń tóraǵalyǵymen ótken jalpy otyrysta depýtattar EAEO sheńberinde aýyl sharýashylyǵy janýarlarymen seleksıalyq-asyl tuqymdyq jumys júrgizýdi birizdendirýge baǵyttalǵan sharalar týraly kelisimdi ratıfıkasıalaý týraly zań jobasyn maquldady.

Otyrys barysynda depýtattar EAEO aıasynda asyl tuqymdy mal sharýashylyǵynyń ortaq naryǵyn damytý jáne bar kedergilerdi joıý maqsatynda Kelisimde seleksıalyq-asyl tuqymdyq jumys salasyndaǵy birqatar is-sharalardy, onyń ishinde asyl tuqymdy ónimge molekýlárlyq genetıkalyq saraptama júrgizýdi birizdendirý kózdelgenin atap ótti.

Sonymen qatar, depýtattar jalpy otyrysta genetıkalyq saraptama júrgizý úshin respýblıkada tıisti materıaldyq-tehnıkalyq baza, sondaı-aq, elimiz asyl tuqymdy maldardy EAEO-tyń qandaı elderimen, qandaı kólemde aıyrbastap kelgeni týraly máselelerdi qozǵady.

Nurlan Nyǵmatýlın osy zań jobasyn talqylaý kezinde depýtattar tarapynan Reseı Federasıasynan asyl tuqymdy maldardy ákelý úshin birqatar kedergiler oryn alatynyn týraly pikirler aıtylǵanyn, al osy ratıfıkasıany qabyldap, oǵan Memleket Basshysy qol qoıǵannan keıin ol TMD elderinen asyl tuqymdy maldardy  kedergisiz alyp kelýge jol ashatyn atap ótti.

Palata Tóraǵasynyń aıtýynsha, osy máseleni Májilis zań jaǵynan qamtamasyz etip otyr, al jaýapty mınıstrlik basqa memlekettik  organdarmen birlesip, uıymdastyrý sharalaryn jasaýy  qajet.

Nurlan Nyǵmatýlınniń pikirinshe, bul aýylsharýashylyǵy salasynda jumys isteıtin kásipkerlerge kómek bolady.