Nur Otan partıasy 216 saılaýaldy baǵdarlamany iske asyrý boıynsha ár jylǵa naqty kórsetkishteri bar Jol kartalaryn ázirledi. Qaraǵandy jáne Shyǵys Qazaqstan oblystarynyń turǵyndary úshin bıyldyń ózinde qandaı ister atqarylatyny týraly partıanyń baspasóz qyzmeti habarlady.

Elbasy, partıa Lıderi Nursultan Nazarbaevtyń tapsyrmasy aıasynda árbir óńirde, qala men aýdanda júıeli baqylaýdy qamtamasyz etý úshin naqty nysanaly ındıkatorlar men merzimder belgilenip, sondaı-aq oǵan jaýapty oryndaýshylar aıqyndaldy.

Qaraǵandy oblysynda aldaǵy 5 jylda 1715 kórsetkish pen 6431 is-sharany oryndaý kózdelgen. 2021 jyly «Nur Otan»-nyń saılaýaldy baǵdarlamasy 21,8%-ǵa, 2022 jyly – 43,4%-ǵa, 2023 jyly – 64,2%-ǵa, 2024 jyly – 83,9%-ǵa jáne 2025 jyly 100%-ǵa oryndaldy.

Bıyldyń ózinde 42 medısınalyq nysannyń 24-i, 29 mekteptiń 5-eýi, 13 balabaqshanyń 5-eýi, jastarǵa arnalǵan 4 jataqhananyń 2-eýi, 18 sport nysanynyń 7-eýi salynady. Sondaı-aq erekshe qajettilikteri bar adamdar úshin 317 nysannyń 63-i beıimdeletin bolady.

2025 jylǵa deıin 150 myń jumys orny qurylyp, 109 týrısik jańa nysan ashylady. 2546 km avtojol, 1215 km sýmen jabdyqtaý jáne 754 km jylýmen jabdyqtaý jelileri salynyp, jóndeledi. 30 myńǵa jýyq otbasy úshin turǵyn úı salý josparlanýda.

Aldaǵy 5 jylda «Qazaqmys» jáne «Arselor Mıttal» kásiporyndaryndaǵy shań jáne gaz tutqysh jabdyqtar jańartylyp, «Saryarqa» magıstraldyq gaz qubyryna qosylý jumystary júredi. Keńgir kentinde bıoelektr stansıasyn, Jańaarqa aýdanynda qoqys suryptaý keshenin, Qaraǵandy qalasynda qoqys jaǵatyn jáne óńdeıtin zaýyttar salý josparlanýda. Memlekettik orman qory jáne ónerkásip kásiporyndarynyń aýmaǵynda da jasyl aımaqtar ulǵaıtylady.

Shyǵys Qazaqstan oblysynda qabyldanǵan Jol kartasy aıasynda 6914 kórsetkish pen is-shara oryndalady. 2021 jyly partıa baǵdarlamasy 22%-ǵa, 2022 jyly – 43,5%-ǵa, 2023 jyly – 64%-ǵa, 2024 jyly – 83,1%-ǵa jáne 2025 jyly 100%-ǵa iske asyrylady.

Osy jyly 2,5 myń shaqyrym avtojoldyń 143 shaqyrymy, 282 shaqyrym sý burý jelisiniń 101 shaqyrymy, 307 sýmen jabdyqtaý nysanynyń 207-si salynady jáne rekonstrýksıalanady. Jalpy, 149 myń jumys ornyn qurý, jastarǵa arnalǵan 7 jataqhana men 20 sport nysanynyń qurylysy josparlanǵan.

Óńirdiń týrısik áleýetin iske asyrý maqsatynda Alakól kóliniń jaǵalaýyn kórkeıtý, Úrjar aýylyndaǵy áýejaıdy qaıta jańartý jáne Buqtyrma sý qoımasy arqyly kópir salý josparlanýda.

Barlyq saılaýaldy ýádelermen nurotan.kz jáne nurotan2021.kz.saıttarynan tanysýǵa bolady.