"Kúsheıtilgen baqylaýdaǵy A sektorynan jalyndy sálem. Reseı túrme júıesi meni tańǵaldyra alǵanyn moıyndaýǵa májbúrmin. Máskeýden 100 shaqyrym jerge naǵyz konslager qurýǵa bolatynyn oılamappyn. Ázirge zorlyq-zombylyq kórsetpedi, tipti ondaı pıǵyldy da baıqamadym. Dese de sottalǵandardyń úreıli túrine, basyn artyq qımyldatýǵa qorqatynyna qarap, Pokrovta jaqynda ǵana adamdardy aǵash balǵamen ólimshi etip sabaǵany týraly kóptegen oqıǵalarǵa ońaı senem. Qazir ádis-tásil ózgergen. Shynymdy aıtaıyn, mundaı sypaıy sóılesetin jerdi buryn-sońdy kórgenim esimde joq. Sondyqtan da ózimniń jańa úıimdi "bizdiń meıirimdi konslager" dep ataımyn" delingen Navalnyıdyń facebook paraqshasynda jarıalanǵan hatta.

 

Saıasatkerdiń aıtýynsha, rejım, jarǵy, kún tártibi, bitpeıtin erejeler qatań saqtalady. Boǵaýyz sóz ben jargonǵa tyıym salynǵan. Tyıym qatań oryndalady. Barlyq jerde kamera. Bolmashy buzýshylyqqa hattama toltyrylady.

 

"Barlyǵyna kúlip qarar bolsaq, ómir súrýge bolady. Jalpy jaǵdaıym jaqsy" degen ol keýdesinde aty men sýreti salynǵan taqta baryn, ol qyzyl jolaqpen belgilengenin aıtady. "Qyzyl jolaq Navalnyı qashyp ketýge peıil" degendi bildiredi.

 

"Túnde ár saǵat saıyn tósegimniń janynda býshlagtaǵy er adamnyń turǵanynan oıanyp ketem. Ol meni kameraǵa túsiredi de "Saǵat eki jarym, sottalýshy Navalnyı. Qashýǵa beıil degen profılaktıkalyq esepten shyǵarylady. Ornynda" deıdi. Artynsha, meni umytpaǵan, eshqashan joǵaltpaıtyn adamdardyń baryn oılap qaıtadan uıqyǵa ketem. Keremet emes pe? Sizder de jaqyndaryńyzben baılanys úzbeńizder. Barlyǵyn qushaqtady" delingen Navalnyıdyń hatynda.

 

Alekseı Navalnyı reseılik oppozısıoner, jemqorlyqqa qarsy kúres qorynyń negizin qalaýshy. 2018 jyly ótken prezıdent saılaýyna qatyspaq bolǵanynda kandıdatýrasy alynyp tastalǵan. 2020 jylǵy tamyzda ony áldekimder ýlap, ólim aýzynan qalǵan. Alekseı Navalnyı buǵan Reseı prezıdenti Vladımır Pýtındi aıyptady. Densaýlyǵy ońalǵan soń Navalnyı ózin ýlaǵandardy anyqtaý maqtasynda zertteý júrgizip, onyń nátıjesinde ózin Pýtın ýlaǵanyn aıtady. Uzamaı Navalnyı em alǵan Germanıadan otany – Reseıge oralyp, Máskeýge qonǵan boıda ustalady. Sot ony merziminen buryn bostandyqqa shyǵý shartyn buzdy degen aıyppen sottady. Alekseı Navalnyı buny "óziniń únin óshirý úshin ádeıi jasalǵan bılik áreketi" dep sanaıdy. Sondaı-aq Navalnyı qamalǵannan keıin onyń komandasy "Pýtınniń záýlim saraıy" týraly derekti fılm shyǵardy. Fılm youtube jelisinde 100 mln-nan astam qaralym jınap, álemniń kóptegen elinde kórildi. Kreml "fılmde aıtylǵan derekter shyndyqqa janaspaıdy" dep málimdedi. Artynsha, Reseıdiń 10-daǵan qalasynda Navalnyıdy bosatýdy talap etken mıtıńter ótti. Narazylyq aksıalary kezinde belsendiler jappaı qamaldy.