The New Yorker jýrnaly Qytaıda qamalǵan qazaqtar týraly derekti fılm jarıalady. 

Anımasıalyq túsindirmeleri bar  derekti fılmde Qytaıdyń Shyńjań Tarbaǵataı aımaǵyndaǵy qaıta tárbıeleý lagerine qamalǵan úsh etnıkalyq qazaqtyń bastan ótken oqıǵalary baıandalady. 

Fılm qazaq tiline aýdarylyp, aǵylshyn tilindegi nusqasymen birge The New Yorker jýrnalynyń YouTube arnasynda jarıalanǵan. 

BUU Qytaıdyń Shyńjańynda 1 mıllıonnan astam adam "qaıta tárbıeleý ortalyqtary" dep atalatyn lagerlerde qamaýda otyrǵanyn aıtady. 

Al Beıjiń alǵashqy kezderi ondaı ortalyqtardyń bar ekenin joqqa shyǵarǵan bolsa da, keıinirek ortalyqtarda "kásiptik bilim beriletinin" aıtýdan tanbaı keledi. 

Jaqynda BBC Shyńjańdaǵy lagerlerge qatysty májbúrli eńbek jáne jappaı jynystyq zorlyq týraly habarlady. Kóp ótpeı AQSH memlekettik departamenti jaǵdaıǵa qatty kóńil aýdaratynyn aıtyp, Beıjińdi aıyptaıtyn málimdeme jasady.

Memlekettik departament ókili  "qatygezdikter bizdi qatty alańdatty. Bul qatygezdikter ar-ujdanǵa da aýyr soqqy. Mundaı saıasaty úshin Beıjińge úlken saldary bar jaýap qaıtarý kerek" dep málimdedi.

Al Ulybrıtanıa parlamentinde Shyńjań aımaǵyndaǵy májbúrli eńbekke qatysty ulybrıtanıalyq kompanıalardy tekserý kerektigi kóterildi.