Prezıdent Qasym-Jomart Toqaev koronavırýsqa qarsy is-qımyl jónindegi keńeste densaýlyq saqtaý mınıstri Alekseı Soı men úkimetttiń jumysyn synǵa aldy, dep habarlady Aqorda. 

Toqaev vaksınasıanyń keshigýi abstraktili másele emes ekenin jetkizdi.

– Áńgime eldiń ulttyq qaýipsizdigi, azamattarymyzdyń densaýlyǵy men ólimi, joǵalǵan kásipkerlik kirister, búdjetke túsken salyqtar jáne ulttyq baılyqtyń jalpy quldyraýy jaıynda bolyp otyr.

Alekseı Vladımırovıch, men sizge densaýlyq saqtaý mınıstri – úkimettiń sheshýshi tulǵasy, erekshe ókilettigińizdiń baryn aıtqanmyn. Jumysty jaqsy bastadyńyz, keıin báseńdep kettińiz, – dedi prezıdent.   

Toqaev epıd ahýal jaqsarmasa, kadrlyq aýys-túıis bolýy múmkin ekenin aıtty.

– Sáýir aıynda jaǵdaıdy ózgertýińiz kerek. Áıtpese, kadrlyq aýysýlar bolýy múmkin. Bul sizge unamaıtyny anyq. Bul densaýlyq saqtaý mınıstrine ǵana emes, jalpy úkimetke qatysty, – dedi Qasym-Jomart Toqaev.

Sonymen qosa prezıdent elimizde qorǵaný quraldarynyń tapshylyǵy men sapasynyń tómendigi baıqalǵanyn tilge tıek etti.

– Jekelegen óńirlerde qorǵaný quraldarynyń tapshylyǵy men sapasynyń tómendigi baıqalady. Biz "SK-Farmasıa" basshylyǵyn aýystyrdyq. Dál qazir jańa basshy basqarý múmkindikterin kórsetetin sát. Jaǵdaı rettelmese jańa basshy da jumystan bosatylady, – dedi prezıdent.