Ult ókilderin tanystyrǵan, tabystyrǵan - Qapshaǵaı!  Almaty oblysynyń irgeli, ónimi molaıyp, kásibi órke domalap kele jatqan Shýaqty qalanyń óziniń ishine buqqan qanshama syry bar. Sulýlanǵan shahar qanshama jastyń qýanyshyn kórip, mahabatyna kýá bolsal, sol sekildi qanshama jandardy toǵystyryp baqyt syılap keledi. Osyndaı aýyzbirligi jarasym tapqan, shańyraǵynyń berekesi kirgen baqytty jandardyń biri - Margarıta Nam men Maksım Ortýmbaev. Búginde aırandaı uıyp otyrǵan otbasynyń ekeýi de aralas ulttyń perzentteri. Eki balanyń anasy Margarıtanyń ákesi káris, sheshesi orys, al otaǵasynyń anasy ýkraın, ákesi qazaq. Eń qyzyǵy olardyń ata-analary da, ózderi de osy kıeli qalada tanysyp, úıli-barandy bolyp, tatý tátti ómir keshýde. Qazirgi ýaqytta ata-enesi Temirtaý qalasynda turyp jatqanymen aıdyndy kóldi Qapshaǵaıǵa jıi kelip júredi eken. Bul jer qaı-qaısyna da unaıtyn, jaǵymdy orynnyń biri. Shaǵyn óńirdiń jyldan - jylǵa ár salasy qanatyn keńge jaıyp damyp otyrǵandyqtan, munda ómir súrý de yńǵaıly, jaıly ekenin jasyrmady úshinshisin kútip júrgen ana. Osyndaı kóp ultty bir shańyraq astyna jınaǵan otbasy musylman, hrıstıan, káris mádenıeti men salt-dástúrin ustanady. Margarıtanyń sózine qaraǵanda, joldasy ekeýi birneshe mádenıetti jáne dindi boılaryna sińirip ósken. Elimizdiń ortaq meıramdaryn: onyń ishindegi naýryz, jańa jyl, basqa da dástúrli merekelerdi asa úlken daıyndyqpen qarsy alady. Munda barlyq ádep-ǵurypqa saı san alýan taǵamdar daıyndalyp, aq dastarhan jaıylady. Dál osy dastarhan basynda barshasy jınalyp, úlkender batasyn berip, qýanyshqa toly qyzyqty ótkizetinderin aıtady. Búginde qos juptyń qalanyń ortalyǵynda ornalasqan «Kıddı býtık» balalar dúkeni bar. Osy otbasylyq kásipti bolashaqta qyzy Sofá men uly Emırhan ary qaraı dóńgeletip áketetinderine senimdi. Yntymaǵy kelisken shańyraq ıeleri týǵan jerleri Qapshaǵaıdyń órkendeýine at salysyp, qalanyń áleýetiniń damýyna barynsha óz úlesterin qosyp kelemiz deıdi.