Tatarstan avtonomıalyq respýblıkasynyń astanasy Qazanda mektepke shabýyl jasap, oq atqan Ilnaz Galávıev esimdi 19 jastaǵy azamat týraly tolyǵyraq aqparat shyqty. Bul týraly  mbk-news.appspot.com saıty habarlady. 

Belgili bolǵandaı kúdikti buryn ózi shabýyl jasaǵan  Djaýdata Faızı kóshesinde ornalasqan №175 mektepte bilim alǵan. 

Keıin kolejge IT mamandyǵy boıynsha oqýǵa túsken. Alaıda sáýir aıynda nashar úlgerimine baılanysty oqýdan shyǵarylǵan.

"TISBI" bilim ordasynyń habarlaýynsha, Ilnaz Galávıev oqý barysynda ol ózin tynysh jáne janjalsyz stýdent retinde kórsetken.

– Ol árdaıym uqypty jáne sabyrly edi, basqa stýdentter men muǵalimderge qurmetpen qaraıtyn. Jeltoqsan aıynan bastap Ilnaz óndiristik tájirıbege, qańtardan bastap kolejge kelmedi jáne top kýratorymen baılanysyn úzdi. Ol óndiristik tájirıbe men úsh memlekettik emtıhandy qorǵaýǵa kelgen joq, nátıjesinde ol oqýdan shyǵaryldy, – dep habarlady "TISBI" ýnıversıtetiniń baspasóz qyzmeti.

Jaqynda Galávıev "Qudaı" dep atalatyn telegram arna ashqan. Qazir buǵattalǵan. Ol onda 6 mamyrda jazba qaldyrǵan. 

–  Meni qudaı retinde tanyp, bári ózderin meniń quldarym retinde tanýyn qalaımyn. Sizder men qalaǵan nárseni jasaýlaryń kerek. Álemde tiri jaratylys qalmaýy kerek, bul ǵalamnyń qateligi, – dep jazady ol.  

Ol sondaı-aq "osy álemde sizderdiń barlyǵyńyzdan qutylý úshin adam keıpinde paıda boldym" dep qosady.

Sonymen qatar, telegram arnada onyń betiniń tómengi bóligin jaýyp turatyn sharftaǵy sýreti boldy, oǵan "Qudaı" dep jazylǵan.

Galávıev "Hatsan ESCORT PS" myltyqpen qarýlanǵan. Qarý oǵan resmı túrde tıesili bolǵan. Memlekettik Dýmanyń depýtaty Aleksandr Hınshteın óziniń telegramynda jazǵanyndaı oq atqan adam qaıǵyly oqıǵadan biraz buryn, 28 sáýirde qarýǵa ruqsat alǵan.