«Nur Otan» partıasy tóraǵasynyń birinshi orynbasary Baýyrjan Baıbek Facebook-tegi paraqshasynda «Árbir bala mektepke barýǵa laıyq» atty bolashaqtyqtardyń ınklúzıvti bilim berýdi damytý jobasy týraly aıtty.

«Qurmetti dostar! Ózderińizge málim, elimizdiń tuńǵysh prezıdenti Nursultan Nazarbaevtyń bastamasymen Táýelsizdiktiń alǵashqy jyldarynda «Bolashaq» baǵdarlamasy quryldy. Osynaý teńdessiz sheshimniń arqasynda 14 myńnan astam qazaqstandyq álemniń úzdik oqý oryndarynda bilim aldy. Osy baǵyttaǵy 11 halyqaralyq stıpendıa arasynda úzdikterdiń biri dep tanylǵan «Bolashaq» baǵdarlamasy elimizde básekege qabiletti adam kapıtalyn qalyptastyrýǵa múmkindik berdi.

Osydan 20 jyl buryn baǵdarlamanyń alǵashqy túlekteri «Bolashaq» stıpendıattarynyń qaýymdastyǵyn qurǵan bolatyn. Búginde ol tabysty úkimettik emes uıymdardyń birine aınalyp otyr. Bıyl «Bolashaq» korporatıvtik qorynyń da qyzmet etip kele jatqanyna 10 jyl tolady.

Osy jyldar ishinde qor bilim berý granttary arqyly talantty balalardy qoldaýǵa baǵyttalǵan 70-ten asa ártúrli áleýmettik jáne qaıyrymdylyq jobalardy iske asyrdy. Bulardyń qatarynda joǵary halyqaralyq standart boıynsha balalarǵa arnalǵan mýltımedıalyq kontent jasaý jáne basqa da jobalar bar.

Sonymen birge, «Bolashaq» qorynyń 6 jyldan astam ýaqyttan bergi basym baǵyttarynyń biri – «Árbir bala mektepke barýǵa laıyq» atty ınklúzıvtik bilim berýdi damytý jobasy.

Búginde búkil el kóleminde 59 mamandandyrylǵan saýyqtyrý mekemesi men kabınetteri ashylǵan. Olar 2 myńnan astam erekshe balalardy, onyń ishinde Nursultan Nazarbaev Qorynyń qarjylandyrýy esebinen ashylǵan 16 «Qamqorlyq» ınklúzıa kabınetin qamtıdy. 420 joǵary bilikti jumys orny ashylyp, 1300 maman men ata-ana oqýdan ótti. Memleket deńgeıinde júıeli túrde sheshý úshin qor 78-den astam usynys pen zańnama aktilerine túzetýler engizdi.

Erekshe qajettilikteri bar balalarǵa qoldaý kórsetý partıa lıderi 2014 jyly bastamashylyq etken «Kedergisiz keleshek» jobasy men Memleket basshysy Qasym-Jomart Toqaev tanystyrǵan «Nur Otan»-nyń saılaýaldy baǵdarlamasynyń da basymdyqtarynyń biri bolyp tabylady. Osyǵan oraı 2025 jylǵa deıin búkil kolej ben joǵary oqý oryndarynda, sondaı-aq mektepter men mektepke deıingi uıymdardyń 70%-ne ınklúzıvtik bilim berýdi endirýdi qamtamasyz etý mindeti qoıyldy.

BUU bastamasymen jyl saıyn Dúnıejúzilik aýtızm máselesi týraly aqparatty taratý kúni atap ótiledi. Qazaqstanda erekshe bilim alý qajettiligi bar balalardyń sany 160 myńnan asady, onyń ishinde 35 myń bala aýtızmge shaldyqqan.

Sondyqtan «Bolashaq» qory 5 jyl boıy Inklúzıvtik bilim berýdi nasıhattaý boıynsha úzdik materıal respýblıkalyq konkýrsyn ótkizip keledi. Bıyl 40-tan astam buqaralyq aqparat quralynan 138 jumys tústi.

Marapattaý saltanaty barysynda barsha qatysýshylarǵa «Árbir bala mektepke barýǵa laıyq» jobasyn qoldaǵany, sondaı-aq qoǵamda yntymaqtastyqty arttyrýǵa qosqan úlesi úshin alǵys aıttym.

Osynaý iske beıjaı qaramaıtyn barsha mesenattarǵa, mamandar men ata-analarǵa arnaıy raqmet aıtamyn. Qoǵamdaǵy nemquraıdylyq pen samarqaýlyqty seıiltip, erekshe qajettiligi bar árbir balany áleýmettik ortaǵa tarta otyryp, tolerantty qarym-qatynas qalyptastyrý – bizdiń ortaq mindetimiz», – dep atap ótti Baýyrjan Baıbek.