Aǵylshyn sarapshylary Qytaımen jappaı soǵys qaýpin eskertti. Ulybrıtanıanyń iri soǵys kemesi bastaǵan top Ońtústik Qytaı teńizine qaraı jyljyp bara jatqanda shuǵyl eskertý jasalǵan..

Ulybrıtanıa koróldik áskerı-teńiz kúshteriniń eń iri soǵys kemesimen birge shyqqan áskerı toptyń Ońtústik Qytaı teńizindegi daýly aımaqqa birinshi ret  jedel ornalasýy Beıjińmen shıelenisti órshitýi múmkin dep boljanýda. 

Ulybrıtanıanyń Portsmýt áskerı-teńiz bazasynan jolǵa shyqqan 3 mıllıard fýnt sterlıńtik áskerı kemede 1600 sarbaz bar.

Ońtústik Qytaı teńizindegi bul operasıaǵa baılanysty Qytaı tarapy birneshe ret qatań eskertý jarıalady.

Qytaı halyq-azattyq armıasy áskerı-teńiz kúshteri sońǵy aptalarda daýly aýmaqta atys jattyǵýlaryn kóbeıtti.

Qytaı syrtqy ister mınıstrliginiń ókili Chjao Lıszán "Qytaı óziniń ulttyq egemendigi men qaýipsizdigin saqtaý úshin qajetti sharalardy qoldanýdy jalǵastyrady" dep málimdedi.

Jaqynda amerıkalyq áskerı keme "Qytaıdyń Sısha terıtorıalyq sýlaryna kirdi" degen aqparattan keıin Beıjiń taǵy da qatań eskertý jarıalaǵan.

Ulybrıtanıa soǵys kemesi aımaqqa saparǵa attanǵan kezde, aǵylshyn qorǵanys mınıstri Ben Ýolles Qytaıdyń teńiz talaptarynyń kúsheıip bara jatqany týraly eskertti.

– Biz ózimizdiń qundylyqtarymyz ben quqyqtarymyzǵa qaýip tóngen kez kelgen jerde, óz aýlamyzda ǵana emes, jaǵalaýlarymyzdan alys jerde de ádilet jaǵynda bolýymyz kerek. Bul ornalastyrý bizdiń óz kúshimizge ıe ekenimizdi, biraq odaqtastarymyzben odan da kúshti ekenimizdi kórsetedi, – dedi ol.

Alaıda Ulybrıtanıa qorǵanys tańdaý komıtetiniń tóraǵasy Tobıas Ellvýd Aǵylshyn qorǵanys mınıstrligi Ońtústik Qytaı teńizine júzýdiń qaterin tolyq baǵalamady degen pikirde.

– Biz Qytaıdyń strategıalyq yqpalyn alǵa jyljytqanyn kórip otyrmyz jáne bizdiń áskerı-teńiz flotymyz Qytaı basymdylyq bergen aımaqtarmen básekelese almaıdy, – dedi Tobıas Ellvýd.

Ulybrıtanıa ıadrolyq qarýsyzdaný kampanıasy, soǵysty toqtatý koalısıasy depýtattary jáne mádenıet qaıratkerleri daýly aımaqtaǵy shıelenistiń artýyna alańdap premer-mınıstr Borıs Djonsonǵa hat jazǵan.

"AQSH-tyń joıǵysh ushaqtarymen birge iri soǵys kemesin Ońtústik Qytaı teńiziniń daýly sýlaryna jiberý Qytaımen tek qaqtyǵystarǵa ákelýi múmkin, tipti odan ári órshýi múmkin. Qaqtyǵys ıadrolyq qarýly memleketpen soǵys yqtımaldyǵyn joǵarylatady. Qazir myltyq dıplomatıasynyń ýaqyty emes. Biz otarlyq ádiletsizdik faktilerimen betpe-bet kelip, ımperıalyq mıfterdi dáripteýdiń ornyna yntymaqtastyqtyń jańa tásilderin izdeýimiz kerek" deıdi aǵylshyn depýtattary.