Nur Otan partıasy tóraǵasynyń birinshi orynbasary Baýyrjan Baıbektiń talap aryzy boıynsha Almaty qalasy Áýezov aýdandyq №2 sotynda ótken azamattyq-prosessýaldyq proseste sýdıa Raıhan Sartaeva shaǵymdanýshy tarap paıdasyna sheshim shyǵardy.

Sýdıa "belsendiler fılmdegi aıyptaýlarǵa birde-bir dálel usynbady, fılmdegi málimetter shyndyqqa janaspaıdy" dep málimdedi.

Sot sheshimine saı jaýapkerler belsendi erli-zaıypty Janbolat Mamaı men Inga Imanbaı "Baýyrjan Baıbektiń Almaty qalasy ákimi bolyp turǵan kezdegi jemqorlyq áreketteri týraly" delingen eki tildegi fılmdi Demokratıalyq partıa youtube arnasynan óshirýge, ol jerde aıtylǵandardy teristeýge, shaǵymdanýshy taraptyń 438 201 teńge kólemindegi sotqa ketken shyǵynyn óteýge mindetteldi.

Belsendi Janbolat Mamaı facebook paraqshasynda "sottyń materıaldardy óshirý týraly sheshimi oryndalmaıtynyn" jazyp, búgin saǵat 12:00-de sot qorytyndysy boıynsha baspasóz konferensıasy ótetinin habarlady.

Belsendi buǵan deıin B.Baıbek tarapy ózderinen 876 myń teńge talap etip otyrǵanyn, sot ótinishti qanaǵattandyrsa, Nur Otan partıasy Almaty fılıalynyń aldyna Baýyrjan Baıbektiń plakatyn shyǵaryp, sonyń qasyna el-jurttan aqsha jınaı̆tynyn málim etken.

B.Baıbek-J.Mamaı teketiresi belsendiniń NurOtan partıasy tóraǵasynyń orynbasary týraly eki tilde vıdeomaterıal jarıalaýynan bastalǵan. Janbolat Mamaı ol jerde UZUN Qulaq telegram kanalynda, ashyq derekkózderde, birqatar baspasóz betterinde jarıalanǵan aqparattardy, derekterdi negizge alyp, B.Baıbekti Almaty ákimi bolyp turǵanda "búdjet aqshasyn "jep" mıllıarder atandy" dep aıyptaıdy. Buǵan jaýap retinde B.Baıbek NurOtan partıasynyń eks-depýtaty, búginde youtube jelisinde vıdeoblog túsirýmen aınalysyp júrgen Táńirbergen Berdońǵarǵa suhbat berip, oppozısıonerdiń aıyptaryn teristep, ony sotqa beretinin málim etti. Munan soń Janbolat Mamaı Qazaqstan soty ózin jyǵyp beretinin aıtyp, Baıbekti tikeleı efır rejıminde ashyq debatqa shyǵýǵa shaqyrǵan. Uzamaı NurOtan partıasy atynan májilis depýtaty atanǵan Elnur Beısenbaev Qazaqstan arnasynyń jýrnalısi Nartaı Aralbaıulynyń youtube arnasyna suhbat berip, Janbolat Mamaıdyń Baýyrjan Baıbekti debatqa shaqyrýyn synap, Mamaıdyń ózin debatqa shaqyrady. Buǵan jaýap retinde Mamaı debatqa basqa-basqany emes, óziniń sózderin "ótirik" degen, sotqa beretinin aıtqan Baýyrjan Baıbekti shaqyrǵanyn jetkizgen.