«Qazaqstan Respýblıkasyndaǵy saılaý týraly» Qazaqstan Respýblıkasy Konstıtýsıalyq zańynyń 113-3-babyna sáıkes 2021 jylǵy 25 shilde de aýyldyq okrýgter ákimderin saılaýy ótedi. Zańdaǵy jańa basymdylyq aıasynda aýyl ákimin buqaranyń tańdaýy Almaty oblysynyń 71 okrýginde ótkiziledi. 

Barlyǵy saılaýda 17 aýmaqtyq jáne 198 ýchaskelik saılaý komısıalary, 1451 saılaý komısıalarynyń músheleri jumys isteıdi. Saılaýshylar sany 221672 adamdy quraıdy.
279 tulǵa usynymdaryn jiberip úlgergen. Onyń ishinde 93-i saıası partıanyń ókilderi bolsa, 186 azamat aýyldyq okrýgti basqarýǵa qaýqarlymyn dep, ózin-ózi usynǵan. Aıta ketý kerek, Aqsý, Alakól, Kegen, Kerbulaq, Panfılov aýdandaryna qarasty aýyldyq okrýgterine ákim bolyp saılanamyn deýshiler ózin-ózi usynǵan.
Kandıdattar arasynan 243-i talapqa saı kelse, 16 tulǵa saıası básekeden shet qaldy.
«154 úmitker jumys istep júrgen memlekettik qyzmetshiler bolyp tabylady. Onyń ishinde 35 úmitker qaıta saılaný arqyly daýysqa salynady. Ortasha básekelestik – 3,9 adam. Barlyq okrýgterde úmitkerlerdiń sany 3-ten kóp. Eń kóp úmitker tirkelgen aımaq, İle aýdany Chapaev aýyldyq okrýgi. Mundaǵy kandıdattardyń sany 9-y qurap otyr»,-deıdi Almaty oblystyq saılaý komısıasynyń múshesi Qaharman Jaqsylyq.
Respýblıkalyq búdjetten árbir kandıdatqa úgit-nasıhat jumystaryn júrgizýge 220 myń teńge qarjy bólinedi. Kórsetilgen soma BAQ-ta jarıalaý, úgit materıaldaryn shyǵarý, kólik shyǵyndaryn óteýge jumsalatyn bolady.
Saılaýǵa túsýshi tulǵalardan usynym qabyldaý 9 shilde kúni máresine jetedi. 14 -24 shilde aralyǵynda úgit jumystary júrgiziledi. Al, 25 shilde de saılaý ótetin bolady. Osylaısha 71 okrýgte sý jańa ákim memlekettik qyzmettiń tiziginin qolyna alady.
Aıta keteıik, Raıymbek aýdany men Taldyqorǵan jáne Qapshaǵaı qalalary mańyndaǵy okrýgterdiń basshylarynyń qyzmettik merzimi aıaqtalmaǵanyna baılanysty, osy aımaqtarda aýyldyq okrýgter ákimderin saılaýy ótkizilmeıdi.