Jańaózen qalasynyń «Astana» shaǵynaýdanynda ornalasqan jylyjaıdyń qurylysy osydan bes jyl buryn bastalǵan bolatyn. Jylyjaıda jylyna 50-60 myń tonnaǵa jýyq ónim óndiriledi.

Jylyjaıdyń ıesi Ǵaıbolla Qabylulynyń aıtýynsha, jylyna eki ret ónim alady eken. Kúzde – qyzanaq, kóktemde – qıar men qyzanaqty jınaıdy. Bir túp qyzanaq toqsan kúnniń aınalasynda tolyqtaı pisedi.

«Osy jerde kókónistiń tórt myńdaı túbi otyrǵyzylǵan eken. Eńbektiń arqasynda ónimderimiz jyldan-jylǵa jaqsy nátıje berýde»,- deıdi Ǵ.Qabyluly.

Ǵaıbolla Qabylulynyń ıeligindegi jylyjaıdyń aýmaǵy 24 sottyq jerdi alyp jatyr. Bul jerde  9 myń túpteı qıar egilgen.

«Elý-alpys tonnadaı ónim beredi dep otyrmyz. Eń az degende. Kútimge baılanysty. Jaqsylap qaraı alsaq, jaqsy ónim berip qalady degen úmitimiz bar. Qańtar-aqpan aıynda birinshi lek egilse, ekinshi legi  shilde aıynyń ortasynda jańadan otyrǵyzylady. Pisken ónimdi bir kún tastap, terip otyramyz jáne arnaıy paketke salamyz. Básekelestik bar. Ónimderdi iri saýda núktelerine kóterme baǵamen bir-aq satamyn»,-deıdi kásipker.

Qazaqstan naryǵyn syrttan emes, ózimizdiń otandyq ónimmen qamtamasyz etýge baǵyttalǵan jańaózendik kásipkerdiń áreketi óz jemisin berýde.

Eńbekqorlyǵy men tózimdiliginiń arqasynda Ǵaıbolla Qabyluly kedergilerdi jeńip, kókónisterin kútip-baptaýda. Aımaqta jumyssyz júrgen bes-alty azamatty turaqty jumyspen qamtyp otyrǵandyǵy jáne bar. Aldaǵy ýaqytta jylyjaı ıesi osy bastamasyn keńeıtýdi kózdep otyr.

Osydan 11 jyl buryn Elbasy N.Nazarbaevtyń bastamasymen «Agrobıznes – 2020» baǵdarlamasy júzege asqan bolatyn. Atalmysh baǵdarlama aıasynda sýbsıdıalaýda ózgerister oryn aldy. Nátıjesinde elimizdiń ár aımaǵyna qysy-jazy jańa pisken kókónister úzdiksiz jetkizile bastady. Jylyjaıdyń ár gektaryna bólingen qarjyǵa tyńaıtqyshtar, tuqym alynyp, sharýashylyq ıelerine az da bolsa memleket tarapynan kórsetilgen kómektiń bir ushy boldy.
 
Mańǵystaý oblysy ákiminiń baspasóz qyzmeti