Búgin men Almatty qalasy sotynyń azamattyq ister jónindegi sot alqasyna B.Baıbektiń ar-namysyn, abyroıyn jáne iskerlik bedelin qorǵaý jóninde J.Mamaı men I.Imanbaevaǵa qarsy talap-aryzy boıynsha aýdandyq sottyń sheshimine berilgen apelásıalyq shaǵymǵa pikir (qarsylyq) engizdi.
"Ózderińiz biletindeı, sot jaýapkerler taratqan málimetterdi B.Baıbektiń ar-namysy, abyroıy jáne iskerlik bedeline nuqsan keltiredi ári shyndyqqa sáıkes kelmeıdi dep tapty jáne olardy teristeı otyryp, tıisti beınematerıaldardy óshirýdi mindettegen bolatyn.
Sot otyrysy BAQ ókilderiniń qatysýymen onlaın rejımde ashyq ári jarıa túrde ótti. Sonymen qatar, men sot prosesine qatysty barlyq qujattardy kópshilikke ýaqtyly usynyp, egjeı-tegjeıli habardar etip otyrdym.
Apelásıalyq shaǵym jáne oǵan meniń pikirim týraly toqtalyp óteıin.
B.Baıbektiń J.Mamaı men I.Imanbaevaǵa qarsy talap-aryzy boıynsha shyǵarylǵan sot aktisi zańdy jáne tolyqtaı negizdi. Al apelásıalyq shaǵymda keltirilgen dálelder múldem negizsiz.
Atap aıtqanda, appelásıalyq shaǵym Qazaqstan Respýblıkasy Azamattyq prosestik kodeksiniń 404 jáne 427-baptarynyń talaptaryna sáıkes kelmeıdi, sebebi bul qujatta (qosymsha tirkep otyrmyn) is úshin mańyzy bar jáne sheshimniń kúshin joıýǵa nemese ózgertýge negiz bolatyn jańa faktiler nemese birde-bir naqty dálel keltirilmegen.
Shaǵym zańdy túrde durys rásimdelmegen. 8 bettiń ishindegi 7,5 beti – bul tek shaǵym túsirip otyrǵan sot sheshiminen úzindilerden turatyn faktilerdiń sıpattamasy men zań normalary ǵana. Iaǵnı, osyǵan deıingi búkil otyrystardaǵydaı J.Mamaı men I.Imanbaeva jáne olardyń jalǵyz qalǵan zańgeri birinshi sot ınstansıasynyń sheshimin eki ǵana abzasqa syıyp ketken bos sózben jáne rastalmaǵan dáleldermen daýlamaqshy.
Shaǵymnyń mazmunyna kelsek, bul jaýapkerlerdiń B.Baıbekke qatysty keńinen taratqan málimetterine, tolyqtaı jalǵan jáne negizsiz paıymdaryna esh dálel joq ekenin taǵy da kórsetip otyr.
Tańqalarlyǵy sol, buǵan deıin «masshtabty korrýpsıa» faktileri týraly barlyǵyn sendirgisi kelgen J.Mamaı men I.Imanbaeva ózderiniń bergen shaǵymdarynda tek 2 másele – «Qazaqfılm» AQ jer ýchaskesi men avtobýs satyp alý týraly aıtqan. Naqty aıtqanda, jaýapkerler sotqa qandaı da bir jańa qujat pen mańyzdy dálel keltirmegen. Al bul eki másele de buǵan deıin birinshi ınstansıadaǵy sotta barlyq rastaıtyn qujattardy zertteı otyryp, egjeı-tegjeıli qaralǵan bolatyn.
- Endi osy máseleler boıynsha naqty aıtsam. Aldynda dáleldengendeı, «Qazaqfılm» AQ jer ýchaskesi «Rýhanı jańǵyrý» memlekettik baǵdarlamasy aıasynda «Etnolend» jobasyn júzege asyrý úshin Almaty qalasynyń týrızm basqarmasyna berilgen. Joba mádenıet qaıratkerleriniń qatysýymen qoǵamdyq tyńdaýdan ótken. Taǵy aıta ketetin jaıt, bul ýchaske barlyq ýaqytta memlekettik menshikte bolǵan jáne búginge deıin memlekettik menshikte. «Qazaqfılm» AQ bolsa tek uzaq merzimdi jalǵa alý quqyǵyn ǵana ıelengen. Jerdi berý zańdylyǵy úsh ınstansıadaǵy sotta tekserildi, bul týraly tıisti sot aktileri de bar.
«Etnolend» jobasy B.Baıbek ákim bolyp turǵan shaqta bekitilgen. Biraq ony odan ári iske asyrý máselesi Almaty qalasynyń qazirgi basshylyǵynyń quzyretine jatady, sebebi 2019 jylǵy 28 maýsymnan bastap, ıaǵnı 2 jyldan astam ýaqyt B.Baıbek ákim qyzmetin atqarmaıdy.
- Ekinshi másele boıynsha. Avtobýstardy satyp alý Qarjy mınıstriniń 2017 jylǵy 25 jeltoqsandaǵy buıryǵyna sáıkes QR Qarjy mınıstrliginiń Memlekettik satyp alý komıteti tarapynan ortalyqtandyra otyryp júrgizildi. Iaǵnı, Almaty ákimdigi tapsyrys berýshi ǵana bolyp avtobýstardy satyp alýǵa qatysý quqyǵyna ıe bolǵan joq jáne osy sebepti satyp alý nátıjesine eshqandaı áser ete almady. Bul is materıaldaryna qosa tirkelgen konkýrstyq qujattamamen rastalǵan.
Osylaısha, J.Mamaı men I.Imanbaeva esh mazmunsyz, negizsiz apelásıalyq shaǵymy arqyly sheshimniń zańdy kúshine ený sátin jasandy túrde sozyp baǵýda dep naqty aıtýǵa bolady.
Bárine belgili bolǵandaı, jaýapkerler birinshi ınstansıadaǵy sotta barynsha kórsetken destrýktıvti is-áreketin áli de jalǵastyryp baǵýda.
İsti qaraý merzimderiniń keshiktirilýi, qujattardyń ýaqtyly berilmeýi, negizsiz ótinishter men aryzdar, daýdyń máni boıynsha sóılemeý, sotqa jáne prosestiń barlyq qatysýshylaryna qurmetsizdik – mine osylar sot prosesi barysynda J.Mamaı men I.Imanbaevanyń bar sıqyn kórsetti.
Nátıjesinde, men talapker tarapy retinde birinshi ınstansıadaǵy sottyń nazaryn advokattar men jaýapkerdiń ókilderi jibergen zań buzýshylyqtar faktisi boıynsha jeke uıǵarymdar shyǵarýǵa negiz bar ekenine aýdardym. Endi bul máseleni apelásıa deńgeıinde de kóterýdi josparlap otyrmyn.
Apelásıalyq shaǵymdy qaraý boıynsha sot alqasynyń otyrysy 2021 jylǵy 16 tamyzda saǵat 10.00-de, pandemıanyń keńinen taralýyna baılanysy online-formatta ótedi.
Men keltirgen shúbásiz dálelderdi eskere otyryp, sot alqasy birinshi ınstansıadaǵy sottyń sheshimin ózgerissiz qaldyrýy zańdy qubylys bolady dep esepteımin. Bul sheshim zańdy kúshine ene otyryp, J.Mamaı men I.Imanbaevanyń B.Baıbek týraly jarıa málimdemeleriniń zań aıasynda jalǵan jáne negizsiz ekendigin dáleldeıtin bolady.
Sonymen birge, jaýapkerlerdiń sottan keıin qoǵamdyq keńistikte júzege asyryp jatqan destrýktıvti, jeke adamǵa ǵana emes, búkil qoǵam men memleketke zıan keltiretin teris pıǵyldy áreketteri olardyń Demokratıa jáne Zań ústemdigi týraly jarıa málimdemeleri «bir tıynǵa» tatymaıtynyn kórsetedi. Sotta jarıa túrde jáne oısyraı jeńilgen J.Mamaı men I.Imanbaeva sot sheshimi olar úshin túkke turmaıtynyn jáne ony oryndamaıtynyn birden málimdedi.
Jazaǵa tartylmastan quqyq buza berýge ábden úırengen olar aldaryna jan salmaı adamdarǵa betaldy jáne negizsiz jala jaba berýin toqtatar emes. Alaıda, zańǵa sáıkes jaýap beretin kez kelgende olar quqyq aıasyndaǵy áreketterdi birden «sóz bostandyǵyn jáne demokratıany buzý» dep baǵalady. Bul – osy juptyń sınızminiń, prınsıpsizdiginiń jáne qos standartty ustanatynynyń aıdan anyq dáleli.
Shyn máninde, bular úshin Sóz bostandyǵy men Jeke bastyń qadir-qasıeti – quny baqyr tıynǵa tatymaıtyn bos sózder. Buǵan aıqyn dálel – bizdiń daýymyz boıynsha sot sheshimi jarıalanǵan kúni ózderi uıymdastyrǵan brıfıń kezinde óz «maskalaryn sheship», adamgershilikten jurdaı shynaıy kelbetterin jáne moraldyq tabıǵatyn ashyp kórsetken J.Mamaı men onyń sybaılastarynyń jýrnalıske jasaǵan shabýyly.
Zańnyń ústemdigi – kez-kelgen zamanaýı demokratıalyq memlekettiń negizgi qaǵıdasy. Ol barlyq azamattar tarapynan múltiksiz saqtalýy tıis.
Osy rette J.Mamaı men I.Imanbaevanyń sot sheshimin oryndamaıtyny týraly jarıa málimdemesi – elimizdegi konstıtýsıalyq qurylys pen quqyqtyq memlekettiń negizine kúmán keltiretin qaýipti oqıǵa.
J.Mamaı men I.Imanbaeva úshin zańdar men sot sheshimderi qarapaıym formaldylyq qana. Iaǵnı «qalasam – oryndaımyn, qalamasam – oryndamaımyn» qaǵıdasyn ustanatynyn ashyq aıtqany. Olar Qazaqstan Respýblıkasynyń azamaty bola tura, úıinde, oshaq qasynda otyryp «ózderi úshin» jazyp alǵan konstıtýsıamen ǵana ómir súre alamyz dep oılaıdy. Olardyń destrýktıvti áreketterine súıensek, qandaı «quqyqtyq memleket» qurǵysy keletinin naqty boljaýǵa bolady.
Sondyqtan da, zańger jáne azamat retinde, qabyldanyp jatqan sharalar týraly ashyq habarlaı otyryp jaýapkerlerdiń sot sheshimin zańda belgilengen merzimde tolyq oryndaýyna barlyq zańdy tásilder arqyly mindetti túrde qol jetkizetin bolamyz!
Sózderimniń rastyǵyna kóz jetkizý úshin men tómende apelásıalyq shaǵymnyń tolyq mátinin jáne oǵan pikirimdi (qarsylyǵymdy) qosa berip otyrmyn. Osyǵan deıingideı, J.Mamaı men I.Imanbaeva tarapynan túrli alyp qashpa áńgimeler men burmalaýlardyń aldyn alý, sondaı-aq ashyqtyq pen obektıvtilikti qamtamasyz etý úshin óz paraqshamda apelásıa otyrysynyń online-translásıasyn júrgizetin bolamyn», – dep jazdy Baıbektiń ókili.
Pikir qaldyrý