Belgili sport komentatory, "Habar" agentiginiń tilshisi Amangeldi Seıithan koronavırýstan qaıtys boldy. Qaraly habardy áriptesi Jandos Aıtbaı rastady.

– Ol kisi aýrýhanada kóp jatqan joq. Keshe jansaqtaý bólimine tústi. Búgin aıyrylyp qaldyq. Sońǵy kúnge deıin jasyryp, jany qınalyp jatsa da eshkimge bildirmedi, – dedi Jandos Aıtbaı.

"Habar" agenttiginiń Almaty oblysyndaǵy menshikti tilshisi Ardaq Aıbaruly Facebook-tegi paraqshasynda jýrnalısiń koronavırýspen aýyrǵanyn jazdy.

– Bul ajal degenge shara bar ma? Belgili sport komentatory Amangeldi Seıithan aǵamyzdan aıyrylyp qaldyq. Myna aty jaman indet eshkimdi aıamady-aý. Ne derimdi bilmeı otyrmyn. Dúnıe – jalǵan degen osy. Otbasy, týǵan-týys, dos-baýyrlaryna qaıǵyra kóńil aıtamyn. Imandy bolyńyz, jezdeke, – dep jazdy ol. 

Amangeldi Mýatqanuly 1969 jyly 11 mamyr kúni Shyǵys Qazaqstan oblysy Maqanshy aýdanynda dúnıege kelgen.

1991-1994 jyldary «Sport» gazetinde istep, 1994 jyly «Qazaqstan» teleradıokorporasıasynda «Tuǵyr» atty baǵdarlama ashyp, júrgizýshisi bolǵan. Ol telearnadaǵy sport bóliminde bas redaktordyń orynbasary qyzmetin de qatar atqarǵan. Keıin «Qumsaǵat» baǵdarlamasynyń sporttyq aqparattar boıynsha prodúseri atanǵan. 

Al 1997 jyly «Habar» arnasyna aýysyp, osy kúnge deıin atalǵan agenttikte jumys istep kelgen edi.

Fýtboldan 1998 jyly Fransıadaǵy álem chempıonatynda qazaq tilindegi komentator bolǵan. Odan keıin 1999 jyly Bangkoktegi Azıa oıyndaryn, 2000 jyly Sıdneıdegi olımpıada oıyndaryn, 2002 jylǵy Solt-Leık-Sıtıdegi aq olımpıadany «Habar» arnasynyń efırinde qazaqsha sóıletken. 

2000 jyly sport jýrnalıserine beriletin Seıdahmet Berdiqulov atyndaǵy syılyqtyń laýreaty bolǵan.