"Talıban" qozǵalysynyń shabýyly qaıta qarqyn alyp, Aýǵanstandaǵy ahýaldyń nasharlaýyna qaramastan, AQSH prezıdenti Djo Baıden bul elden Amerıka áskerin áketý týraly sheshimine ókinbeıtinin aıtty, dep habarlady Gazeta.ru.

Jýrnalısermen ótken kezdesý barysynda Aq úı basshysy Qurama Shtattar aýǵan kúshterine áýeden qoldaý kórsetip, qajetti jaraqtarmen qamtamasyz etýdi ary qaraı da jalǵastyra beretinin jetkizdi.

– Biz 20 jylda trıllıon dollardan asa qarajat jumsadyq. 300 myńnan astam aýǵan sarbazyn oqytyp, zamanaýı jabdyqtarmen jaraqtadyq.

Olar tálipterden san jaǵynan da basym. Soǵan qaramastan biz óz mindettemelerimizdi ary qaraı oryndaı bermekpiz. Biraq áskerdi áketý týraly sheshimime esh ókinbeımin, – dedi AQSH prezıdenti.

AQSH pen NATO Aýǵanstannan áskerin shyǵara bastaǵannan beri jaǵdaı ýshyǵyp, tálipter iri qalalarǵa shabýylyn kúsheıtti.

15 tamyz kúni qarýly toptar Kabýldaǵy prezıdent saraıyna basyp kirdi. Prezıdent Ashraf Ganı Aýǵanstannan qashyp, onyń qaı jerde ekeni áli belgisiz.

Al 16 tamyz kúni "Talıban" qozǵalysynyń resmı ókili elde 20 jylǵa sozylǵan soǵys aıaqtalyp, jýyq arada jańa basqarý formasy jarıalanatynyn málimdedi.