Aýǵanstanda áıelder sońǵy 20 jyl boıy bilim alý, jumys isteý jáne erkindik úshin kúresip keldi. Endi el Talıban qozǵalysynyń qaraýyna ótkennen keıin áıelderdiń árqaısysy sol kúresi úshin jazalanýy múmkin. "The Guardian" basylymy osynaý shıelenisti jaǵdaıda janaıqaıyn jetkizgen aýǵan qyzynyń hatyn jarıalady. Tómende hat mazmuny qazaqshaǵa aýdarylyp, usynylyp otyr.

Jeksenbi kúni tańerteń men ýnıversıtetke sabaqqa bara jattym. Qyzdar jatahanasynan bir top áıeldiń júgirip kele jatqanyn kórdim. Men ne bolǵanyn suraǵanymda "Polısıa bizdi evakýasıalaıyn dep jatyr, óıtkeni tálipter Kabýlǵa kirdi jáne olar parandjasy joq áıelderdi uryp soǵady eken"  dep jaýap berdi. Biz bárimiz úıge qaıtqymyz keldi, biraq qoǵamdyq kólikti paıdalana almadyq. Eshkim bizdi kólikterine otyrǵyzbady, óıtkeni biz úshin jaýapkershilik alǵysy kelmedi. Ásirese provınsıadan kelgen qyzdar qatty qoryqty, olar qaıda bararyn bilmedi. 

 

Osy ýaqytta kóshede turǵan er adamdar qyzdar men áıelderdiń ústinen kúlip turdy. "Baryńdar paranjalaryńdy kıińder", "Bul senderdiń sońǵy ret kóshede júrgenderiń", "Men senderdiń tórteýińe bir kúnde úılenemin" dep bizdi mazaqtap jatty.

Memlekettik mekemeler jabylǵan kezde, meniń ápkem úıge birneshe shaqyrym jaıaý júrip keldi. Ol "men tórt jyl boıy jumys istegen kompúterimdi áreń óshirdim, áriptesterimmen jylap qımaı qoshtastym, bul meniń jumysymnyń sońǵy kúni ekenin bildim", dedi maǵan. 

Men bir ýaqytta Aýǵanstannyń eń jaqsy degen eki ýnıversıtetin aıaqtadym. 2021 jyldyń qarasha aıynda Kabýldaǵy amerıkalyq jáne aýǵanstandyq ýnıversıtetti bitirýim kerek edi. Biraq búgin úıge kelgende,  meniń ómirim kóz aldymnan ótti. Men búginge kúnge jetý úshin kóptegen jyl boıy kún, tún demeı jumys istedim.

Ápkem ekeýmiz birinshi kezekte jeke kýálikterimizdi, dıplomdarymyzdy jasyrdyq. Bul - qorqynyshty boldy. Nelikten biz maqtan tutatyn nárseni jasyrýymyz kerek? Óıtkeni qazir Aýǵanstanda bizge kim ekenimizdi kórsetýge ruqsat etilmeıdi.

Áıel retinde men ózimdi saıası soǵystyń qurbany sıaqty sezinemin. Men endi qatty kúle almaımyn, súıikti ánderimdi tyńdaı almaımyn, súıikti kafede dostarymmen kezdese almaımyn, endi súıikti sary kóılegimdi, qyzǵylt dalabpen ernimdi boıaı almaımyn. Endi men jumysqa bara almaımyn nemese birneshe jyldar boıy oqyǵan ýnıversıtet dárejesin ala almaımyn.

Men tyrnaqtarymdy boıaýdy jaqsy kórdim. Búgin úıge oralǵanda sulýlyq salonyna qaradym, ol jerge manıkúr jasaýǵa baratynmyn. Qyzdardyń ádemi sýretterimen bezendirilgen dúkenniń qasbetin túnde aq túske boıap qoıypty.

Qazirgi jaǵdaıda meniń kózime áıelderdiń qorqynyshty, úreıli túrleri men áıelderdi jek kóretin, olardy adam qurly kórmeıtin, olardyń bostandyqtary bolmaǵanyn qalaıtyn erkekterdiń usqynsyz túrleri ǵana kórinedi. 

Bizdiń eldiń jigitteri bizdi qorǵaýdyń ornyna, talipterdiń jaǵyna shyqqan. Aýǵan áıelderi ózderiniń osy kúngi bostandyǵy úshin kóp nárseni qurban etti.  Men jetim bolǵandyqtan, bilim alý úshin kilem toqýǵa májbúr bolyp, kóp jumys istedim. Kóptegen qarjylyq problemalarǵa qaramastan, bolashaqqa josparlarym kóp boldy.

Endi bári osylaı aıaqtalatyny meniń júregimdi qatty aýyrtady. Endi men ómirimniń 24 jylynda qol jetkizgen barlyq nárseni órteýime týra keledi. Endi olar meniń taǵdyrymdy aıaq asty etedi.