Búro málimetinshe kezdesý barysynda Aron Atabek top múshelerine densaýlyǵyna baılanysty shaǵymdaryn aıtqan.
– Eki qolym aýrady, joǵary kótere almaımyn, búgilmeıdi, qalamsap ustaýdyń ózi qıyn. Aıaǵym da aýyrady, kamera ishinde ǵana júremin, serýenge shyǵýdan bas tarttym. Taksafonǵa koláskamen baramyn. Etapta soqqyǵa jyqqan kezdegi jaraqattarym bolý kerek. Tolyq (medısınalyq-red) tekserýden ótýdi usyndy, biraq men odan bas tarttym. Sebebi meniń jasymda sáýle (oblýchenıe) alý qaýipti dep esepeımin, – degen Aron Atabek.
Búro saıtynyń málimetinshe, mekeme ákimshiligi top múshelerine Aron Atabektiń ambýlatorıalyq kartasyn kórsetken. Onda ol 2021 jylǵy 4 tamyzda qan analızin tapsyrýdan, flúrografıaǵa túsýden, býyndaryn rengenge túsirýden bas tartqany jazylǵan. Mekeme basshysy Qapyshev Ádilhan Temkenuly Aron Atabek medısına qyzmetkerleriniń baqylaýynda ekenin aıtqan.
"228 medısınalyq hattamasynda Aron Atabektiń súıek-býyny aýyratyndyǵy, eki qolynyń da saýsaqtary deformasıalanǵany, jarty jyldan beri ish qatý saldarynan úlken dáretke baralmaı, klızma alatyndyǵy jáne júrgende óneboıy dirildeıtini jazylǵan. Budan bólek, hattamada onyń 30.07.2021 jyly medısınalyq tekserýden bas tartqany jóninde, keıinnen terapevt dárigerdiń tekserýdi kamerada ótkizgendigi jóninde aıtylǵan. Dáriger Aron Atabekke serebroskleroz, dısırkýlátorlyq ensefalopatıa, stenokardıa, sozylmaly gastrıt, sozylmaly gemoroı, qol-aıaqtyń artrozo-artıtti dıagnozdaryn qoıyp, jalpy klınıkalyq analız tapsyrýǵa, vıtamınder ishýge, nevropatolog pen kardıologqa barýǵa, ÝZI, OBP jáne rengenge túsý keńes bergen. Biraq Aron Atabek onyń barlyǵynan bas tartqan" delingen búro aqparatynda.
Kezdesý barysynda Aron Atabek buǵan deıin quqyq qorǵaýshy Elena Semenova sálemdeme alyp kelip turǵanyn, biraq uzaq ýaqyttan beri kelmeı ketkenin aıtqan. Kezdesý sońynda Aron Atabek merziminen buryn bosatýǵa ótinish jazbaıtynyn, úsh jyldan keıin bostandyqqa shyqqan soń tolyqtaı ótemaqy tóletýge shaǵymdanatynyn jetkizgen. Buǵan qosa mekeme basshysynan merziminiń sońyna deıin eshqaıda aýystyrmaýyn surap, sońyna deıin osy jerde qalǵysy keletinin málimdegen.
Aron Atabek 15 jyldan beri túrmede otyr. Ol 2006 jylǵy "Shańyraq" oqıǵasynan keıin 18 jylǵa sottalǵan. Sot Atabekti "Shańyraq" oqıǵasy kezinde qaza tapqan polısıa qyzmetkeriniń ólimine aıypty dep tanyǵan.
Pikir qaldyrý