Barlyǵymyz óz qıalymyzda «Baqyt» jaıly ertegi qurastyryp alǵanbyz. Soǵan ımandaı senemiz. Bizdiń qıalymyzdaǵy ertegige ómirdiń keıipkerleri uqsamaı qalsa, oǵan jat ta kep ókpeleımiz. Nege oǵan ókpeleımiz? Nege durys qıaldamaǵan ózimizge kinárat artpaımyz? Anyǵynda árbir qyz balasy bylaı oılaǵany abzal:
Qazirgi zamanda kóp adam qarym-qatynasty birtutas talaptar tizimimen bastaıdy. Naǵyz jigit mynadaı bolýy tıis, naǵyz áıel pálendeı degendeı.
Janymda qandaı azamattyń bolǵanyn qalaıtynymdy ózim ǵana bilemin. Jurttyń bárine unaı qoımas. Maǵan eshteńe bereshek emes. Ol tek sońynan ergiń keletin er jigit.
Sońynan ergiń keletin er jigit jer betindegi barlyq adam sıaqty túrli qatelikter jasaıdy. Ara-tura ózine senimsizdik tanytady. Bir ispen shuǵyldanady. Jańasyn bastap kóredi. Keıde qulaıdy. Súrinedi. Sosyn qaıtyp turady. Ary qaraı jolyn jalǵastyrady. Ol sýper qaharmannyń kıimin kıip alyp tún jarymynda jarys kóligine otyryp alyp qala kóshelerin kezbeıdi. Tikushaǵyn áınekten turǵyzylǵan bıik ǵımarattardyń tóbesine qondyrmaıdy. Qaltasyna qarý salyp júrmeıdi. Kósheden symdaı tartylyp júrip ótkende sulý bitkenniń bári moınyn buryp úzilip kete jazdamaıdy. Ol jer betindegi jeti mıllıard adamnyń bireýi ǵana. Tań sáriden oıanyp, basqa adamdar sekildi kúnin ótkizetin eki aıaqty pende. Men sıaqty, sen sıaqty. Qany da qyzyl. Barlyq adamdikindeı.
Sońyna ergim keletin er azamat kóp jumys isteıdi. Ózin jetildirýge kúsh salady. Álemdi bıleýge de. (Jigitter jalpy álemdi qutqarýǵa kelgende aldyna jan salmaıdy). Bul maǵan unaıdy. Ol álemdi qutqarǵansha isteıtin usaq-túıek tirshilikterim barshylyq. Men ylǵı da baılanys aıasyndamyn. Árdaıym onyń janynda júrem. Árqashan kóz aldyndamyn. Óıtkeni, bul meniń tabıǵı bolmysym. Óıtkeni, men áıelmin. Áıel bolý degen súıý, sený, qýatyn eseleý, onyń basyna qandaı bult úıirilse de janynda bolý. Sosyn onyń kemshilik, qateligin ózgemen taldamaý, sóz etpeý. Óıtkeni, áıeldiń mahabbaty – qatelikti sóz qylý emes. Eger sońynan erýge turarlyq Azamat bolsa, onda ol bárin durys jasaıdy. Basqasha bolýy múmkin emes. Ol bastaıdy, men ilesem.
Sońynan ergiń keletin jigit keıde nazar salmaýymen, ýaqyt bólmeýimen, ýytty sózimen janyńa qaıaý salady. Sosyn uzaq ýaqyt úndemeı oılanady. Sodan keıin keshirim suraıdy. Shyn júrekten. Men ony keshiremin. Árqashan keshiremin. Sebebi, men de sondaımyn. Men de renjitip alamyn. Men de keshirim suraımyn. Shyn júregimmen. Ol da meni keshiredi. Óıtkeni, ol da men sekildi. Jer betindegi adamdardan esh aıyrmasy joq.
Sońynan ergiń keletin er jigit ara-tura sharshaıdy. Óziniń áleminde oqshaýlanyp, ońasha ketip qalady. Sońynan erýge turatyn jigitterdiń deni solaı etedi. Jalǵyzdyqty sezinip, ómir týraly tereń oılanǵysy keledi. Nemese dostarymen jolyǵyp, ótken-ketkendi sóz etkisi keledi. Jaqsy ǵoı. Óz úńgirine kirip alyp, ómir týraly tolǵanǵysy kelse, tusaý bolmaımyn. Sál tynyǵyp, jańa kúshpen, shabytpen qaıtyp oralady.
Sońynan ergiń keletin azamat óz sezimi týraly kóp aıtpaıdy. Bastapqy kezde súıetinin bildirtedi. Sen onyń ómirinde óte mańyzdy adam ekenińdi sezesiń. Ary qaraı tek seni baqytty etetin qadamdardy jasaıdy. Aıtpaıdy. Tek jasaıdy. Jumysqa barady. İsin dóńgeletedi. Bilimin jetildiredi. Keıde araqashyqtyqty saqtaıdy. Keıde jaqyndaı túsedi. Jaqyndaǵanda qatty qushaqtaıdy. Kózińe týra qaraıdy. Al, sen bul adamnyń sońynan ergiń keletinińdi ǵana sezesiń. Boldy. İshiń sezedi.
Kınodaǵydaı emes. Otshashý, qushaq gúl bolmaıdy. Jáı ǵana etene jaqynyń. Sene alatyn. Ózińe sendire alatyn. Onyń qasynda jáı ǵana baqytty bolasyń.
Jáı ǵana, sońynan ileskiń keletin azamat.
Neni oılap, ýaıymdaıdy deısiń be? Mundaı azamat meniń ómirimde bola ma, joq pa degendi oılap otyrǵanym joq. Oǵan esh alańym joq. Tek... Men ol armandaǵandaı, sońynan ertkisi keletindeı áıelmin be? Bilmeımin. Biraq men kún ótken saıyn qulpyryp kelem. Bilimimdi eselep, janymnyń tereńine úńilip, jaqsylyq jasap, ómirdi aq túspen ólshep. Qulpyra bererim haq.
Dına Rıchards
Aýdarǵan Shynar Ábildá
