Megapolıs ákimi Baqytjan Saǵyntaev kórnekti aǵartýshynyń tarıhı-mádenı murasyn saqtaý maqsatynda tıisti sheshim qabyldady.

Jumys sapary barysynda B. Saǵyntaev A. Baıtursynovtyń murajaı-úıine bardy. Qala ákimi murajaı-úıdi qoǵamdyq qordan komýnaldyq menshikke berý týraly sheshim qabyldanǵanyn aıtty.

«Keler jyly kórnekti aǵartýshy A. Baıtursynovtyń týǵanyna 150 jyl tolady. Mereıtoıǵa daıyndyq barysynda qoǵam qaıratkeri turǵan murajaı-úıdi qala menshigine qaıtardyq. Onyń murasy máńgilik saqtalady», - dep jazdy B. Saǵyntaev óziniń Twitter-degi akkaýntynda.

HH ǵasyrdyń basynda salynǵan murajaı ǵımaraty respýblıkalyq mańyzy bar tarıh jáne mádenıet eskertkishteriniń memlekettik tizimine engizilgen. Ǵımarattyń jalpy aýdany – 160 sh. m.

Murajaı 1993 jyly quryldy jáne 1998 jyly resmı túrde ashyldy. Murajaıda A. Baıtursynovtyń ómiri men shyǵarmashylyǵy týraly 500-ge jýyq materıaldar saqtalǵan.