Ońtústik Qazaqstan oblysynyń ákimi B.Atamqulov Saryaǵash aýdany Qoshqar ata aýyl okrýgine qarasty jalpy orta mektepte oryn alǵan oqys jaǵdaıdy ózi nazarǵa alyp, qatań baqylamaq. Esterińizge salsaq, 12 qyrkúıekte Saryaǵash aýdanyndaǵy №81 Maqtashy jalpy orta mektebinde 2-synyp oqýshysy Aqerke Seıitqul synypty tazalamaq bolǵanda ústine shkaf qulap, kózinen aýyr jaraqat aldy. Osynyń saldarynan jasóspirim bir janarynan aıryldy. Belgilengen tártip boıynsha oqys oqıǵa oryn alǵan ýaqyttan bastap úsh saǵatta jaǵdaıdy mektep ákimshiligi bılik oryndaryna málimdeýi qajet. Alaıda, jaýaptylar bul jaıtty on kún boıy jasyryp kelgen. Osyǵan oraı, №81 jalpy orta mektebiniń dırektory D.Isakova men mektep dırektorynyń tárbıe isi jónindegi orynbasary G.Esenbekova jáne 2 «á» synyp jetekshisi A.Serikbaeva atqaryp otyrǵan jumysynan bosatyldy. Aýdan ákiminiń ókimimen bilim bóliminiń basshysy E.Rysbaevtyń qyzmetine sáıkes emestigi týraly eskertý túrindegi tártiptik jaza qoldanyldy. Búginde A.Seıitquldyń jaǵdaıy bir qalypty. Bul másele oblystyq densaýlyq saqtaý basqarmasynyń baqylaýynda. Eger otadan keıin emin jalǵastyratyn bolsa, ony ońaltý úshin respýblıkalyq medısınalyq mekemelerge tegin joldama beriledi. Árbir qyzmetker óz jumysyn jaýapkershilikpen atqarýy tıis degen óńir basshysy B.Atamqulov osy jaıtty óz jiti nazarǵa alyp, qatań baqylaıtynyn jetkizdi.

OQO ákiminiń baspasóz qyzmeti