Búgin, 29 qyrkúıek Ońtústik Qazaqstan oblysynyń ákimi Beıbit Atamqulovtyń tóraǵalyǵymen ákimdiktiń kezekti májilisi ótti. Jıyn barysynda bilikti dárigerler men mamandardyń jetkilikti ekenin aıtqan oblys basshysy olardyń jumys isteýine tıisti jaǵdaıdyń jasalmaı otyrǵanyn jetkizdi. Májiliste sóz alǵan oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ásıa Temirbaeva bıyl 109 myńǵa jýyq múgedek azamat esepke turǵanyn habarlady. Olardyń 38 paıyzy ońaltý sharalarymen jáne áleýmettik qyzmettermen qamtylǵan. Al múmkindigi shekteýli azamattardyń áleýmettik nysandarǵa kirip-shyǵýy boıynsha óńirdegi 4083 nysannyń 3316-na pandýstar ornatý qajet ekeninde jetkizdi. Bıyl josparlanǵan 621 pandýstyń búginge 50 paıyzy talapqa sáıkestendirilgen. Baıandamashyny tyńdaǵan oblys basshysy bul turǵyda jumystardy kúsheıtip, pandýstardyń talapqa saı salynýyn qadaǵalaýdy jaýapty mamandarǵa tapsyrdy. Basqarma basshysynyń aıtýynsha, jyl basynan beri 1500-ge jýyq múmkindigi shekteýli azamat jumyspen qamtylǵan. Sonymen qatar, basqarma tarapynan uıymdastyrylǵan 16 jármeńkege qatysqan 557 múgedektiń 40 paıyzyna áleýmettik qoldaý kórsetildi. Ákimdiktiń kezekti májilisinde kóterilgen ekinshi másele memlekettik kásiporyndarda eńbek zańdylyqtaryn saqtaý jáne jalaqy qaryzdaryn boldyrmaý jaıynda órbidi. Oblystyń bas eńbek ınspektory Bastar Esqaraevtyń aıtýynsha, jyl basynan beri memlekettik komýnaldy kásiporyndarǵa 18 ret tekserý júrgizilip, nátıjesinde 57 zań buzýshylyq anyqtalǵan. Sondaı-aq, 12 memlekettik úlesi bar seriktestiktiń 78 mıllıon teńgege jýyq jalaqy qaryzy anyqtalyp, búginde tolyǵymen tólendi. Jıyndy qorytyndylaǵan aımaq basshysy eńbek zańnamasyn saqtaýdy, onyń ishinde jalaqy qaryzdaryn boldyrmaý jóninde naqty tapsyrmalar berdi.

OQO ákiminiń baspasóz qyzmeti