28-qyrkúıek kúni Qazaq memlekettik fılarmonıasynda Qazaq handyǵynyń 550 jyldyǵyna oraı «Nur Otan» partıasy jáne partıa hatshysy Qaırat Satybaldyulynyń tikeleı qoldaýymen Jámálı Dıhanulynyń «Syrly ónerdiń syrlasy» atty óner keshi ótken bolatyn. Keshtiń sánin kirgizýge kıno jáne sırk ártisi, óner zertteýshisi, Qazaqstan (KInES) rekordyna 2 ret engen merekelik shara ıesiniń ózimen birge, elimizge eńbegi sińgen birshama óner qaıratkerleri de barynsha atsalysty. Degenmen, jınalǵan kópshilik Jámálı myrzanyń 18 pyshaqty baspaldaqtyń ústimen júrip ótý, aýzymen ot búrkeý, qalana turǵyzylǵan kirpishterdi syndyrý, aýyr gir tasyn qolmen kóterip turyp, tisimen bir adamnyń salmaǵyn eńserý, keýdesine naıza qadaý ispetti nómirlerin taǵy bir súısine tamashalaýǵa kelgen bolatyn. Tarıhı oqıǵaǵa arnalǵan keremet shoý-konserttiń sońy izgi tilekter men fotosessıaǵa ulasty.

Jámálı Dıhanulynyń ómirbaıanyna azdy-kem toqtala ketsek: Tarbaǵataı aımaǵyna qarasty Dórbiljin aýdanyndaǵy Kúrti aýylynda 1971 jyly dúnıege kelgen. Ol 1988-1990 jj. arasynda Shań-Jań ýnıversıtetiniń Qytaı tili aýdarma bóliminde bilim alady. 1991 jyly ol SÝAR pedagogıkalyq ýnıversıtetiniń dene shynyqtyrý fakúltetine túsedi. 1995 jyly támamdaǵan bul bilimin tolyqtyrý maqsatynda Jámálı Dıhanuly sol jyly Shańhaı, Shan-SHı qalasyndaǵy Shyǵys jekpe-jek jáne sırk ónerine túsedi. Oqýyn aıaqtaǵan 1999 jyldan-aq, QHR, SÝAR, sırkshiler qaýymdastyǵynyń múshesine aınalady. 2000 jyly Tarıhı Otanyna túpkilikti qonys aýdaryp, óner, sport salasynda kúni búginge deıin kórnekti nátıjelerge qol jetkizip keledi. 2004 jyldan beri «Nur Otan» partıasynyń múshesi. 2009 jyly «Qarajorǵa» birlestigin quryp, zertteýmen aınalysyp, 15 myń adamǵa bir mezette «Qarajorǵany» bıletip, Qazaqstan (KInES) rekordtar kitabyna engizildi. Keıinnen, 2010 jyly «Qarajorǵa» bıin Qazaqstan Ulttyq sport federasıasynyń qataryna tirketti. 2014 jyly Erjánibek Batyrdyń 300 jyldyq asynda 300 pyshaq júzinen sátti júrip ótip, ózi ornatqan rekordty jańalaǵan bolatyn.

Nazgúl Nazar