Mońǵolıadaǵy qazaq balalary úzdik sheteldik anımasıalyq fılmderdi ana tilinde kórýge múmkindik bergen «Bolashaq» qoryna alǵystaryn bildirdi. 

Baıan-Ólgeı qalasynda turatyn baldyrǵan kórermender 2011 jyly tikeleı Elbasy, Qazaqstannyń Tuńǵysh Prezıdenti Nursultan Nazarbaevtyń qoldaýymen júzege asqan, bolashaqtyqtardyń «Ózińnen basta» qorynyń jobasy aıasynda onlaın-kınoteatrlarda kórsetiletin dýblájdalǵan múltfılmderdiń birin de qalt jibermeı, úzbeı tamashalaıdy.

«Biz Mońǵolıada turatyn qazaq balalary, sizderge «Ózińnen basta» jobasy úshin alǵys aıtqymyz keledi. Osyndaı ıgi ispen aınalysyp, tamasha fılmderdi sapaly dýblájben ana tilinde usynǵandaryńyz úshin raqmet. Shetelde turatyn qazaqtar úshin bul keremet múmkindik. Ózge tilderde kórý múmkindigi bolýyna qaramastan, ana tilinde tamashalaýdyń jóni bólek. Ol – erekshe sezim. Jobany toqtatpaı, ary qaraı damyta berińizder. Osyndaı qyzyqty gollıvýdtyń týyndylar qazaq tilinde jıi shyqqanyn qalaımyn», –dedi joba jankúıerleriniń biri Dýlat Arafat.

Sondaı-aq, balalar vıdeoda «Bolashaq» baǵdarlamasynyń túlekteri qurǵan qordy 10 jyldyq mereıtoıymen quttyqtady.

Aıta ketý kerek, bolashaqtyqtardyń sheteldik fılmderdi memlekettik tilge dýblájdaýy álemdegi biregeı jáne birden bir jeke bastama. 10 jyl ishinde «Ózińnen basta» jobasy aıasynda búdjetten tys qarajat esebinen Disney, Pixar, Marvel jáne Sony Pictures sekildi jetekshi álemdik kınostýdıalardyń 37 fılmi eń joǵary halyqaralyq standart boıynsha tikeleı aǵylshyn tilinen qazaq tiline dýblájdaldy. Olardyń ishinde «Mýlan», «Batyl júrek», «Koko qupıasy», «Moana», «Malefısenta», «Aladdın», «Jan» jáne t.b. kartınalar bar.

25 qarashada qazaqstandyqtarǵa qazaq tilindegi taǵy bir álemdik premera – «Enkanto» fılmi jol tartpaq.Eske sala keteıik, buǵan deıin «Bolashaq» qorynyń Qamqorshylyq keńesiniń qurmetti múshesi Baýyrjan Baıbek qazaq tili túrik tilinen keıingi dýblájdaǵy ekinshi túrki tili jáne «Walt Disney» kompanıasynyń tarıhyndaǵy 39-shy til bolǵanyn aıtqan edi. Sonymen qatar, qazaq tili Shyǵys Eýropa men TMD elderi úshin shyǵarylatyn Blu-Ray-da kórýge arnalǵan qoljetimdi gollıvýdtyq fılmderdiń 7 negizgi tilderiniń qataryna endi.

Jobanyń arqasynda búginde 100-den astam qazaqstandyq akter «Walt Disney Pictures» daýystyq bazasynda tur. Shyǵarmashylyq jáne tehnıkalyq mamandyqtardyń 203 ókili «Walt Disney Pictures» stýdıasynyń standarttary boıynsha dýbláj boıynsha oqýdan ótti.

 

 

 

Posmotret etý pýblıkasıý v Instagram

 

 

 

Pýblıkasıa ot Korporatıvnyı̆ fond «Bolashaq» (@bolashakcharity)