Qazaqstanda 3,5 myńǵa jýyq adam donorlyq organdardy transplantasıalaýdy qajet etedi. Bul týraly búgin Ulttyq ǵylymı kardıohırýrgıalyq ortalyǵynyń transplantasıa boıynsha úılestirýshisi Sáýle Shaısultanova Shymkent júrek ortalyǵynda ótken baspasóz konferensıasynda málimdedi.

Sáýle Talǵatqyzynyń aıtýynsha, júrek almastyrýdy qajet etetinderdiń ishinde 150-ge jýyǵy balalar.
- Búginde búkil álemde transplantasıalyq belsendiliktiń ósýi jáne donorlyq prosesti uıymdastyrýda ilgerileý baıqalady. Jyl saıyn organdardy almastyrý boıynsha 115 myńnan astam operasıa jasalady, al zamanaýı tehnologıalar pasıentterdiń ómirin kóptegen jyldarǵa uzartýǵa múmkindik beredi. Bizdiń elimizde qaıtys bolǵannan keıingi donordan donorlyq organdardy transplantasıalaý 2012 jyldan bastap júrgizilýde. Osy kezeńde 84 júrek jáne 14 ókpe transplantasıasy jasaldy. Degenmen donorlyq máselesi biz úshin áli kúnge deıin sheshimin tappaǵan kúrdeli másele, - deıdi S. Shaısultanova.

Baspasóz konferensıasynda qalalyq densaýlyq saqtaý basqarmasynyń basshysy Baqytjan Pozılov qaladaǵy Júrek ortalyǵynyń transplantasıa jasaýǵa daıyn ekendigin atap ótti. Jospar boıynsha aldaǵy úsh aıda Júrek ortalyǵynyń mamandary aǵza almastyrý otasyn jasamaq. Bul úshin emdeý mekemesiniń ota jasaý zaly operasıaǵa qajetti joǵary tehnologıalyq qurylǵylarmen jabdyqtalǵan. Buǵan qosa kardıohırýrg mamandary arnaıy oqytýdan ótip, biliktiligin arttyrǵan.