El Táýelsizdiginiń 30 jyldyǵy men qazaqtyń tuńǵysh aǵartýshysy Y.Altynsarınniń 180 jyldyǵyna oraı shymkenttik «17» jastar teatry «Ybyraı» drama-ommajyn sahnalady. Qoıylym tusaýkeserine Shymkent qalasy ákiminiń orynbasary Sh.Muqan, pesa avtory, dramatýrg M. Omarova jáne zıaly qaýym ókilderi qatysty.

Dramatýrg M.Omarovanyń aıtýynsha, pesa jastar teatrynyń dırektory, ári kórkemdik jetekshisi Rústem Áýelbekovtiń usynysymen jazylǵan.
— Uly aǵartýshy-pedagog Y.Altynsarınniń 180 jyldyǵyna oraı teatr dırektorynan pesa jazýǵa usynys túskende biraz izdenýge týra keldi. Sebebi, Y. Altynsarınniń aǵartýshylyq qyrynan bólek, ǵalym, etnograf, fólklorshy syndy san qyry bar. HİH ǵasyrdyń sońynda qazaq dalasynda mısıonerlerdiń yqpaly kúsheıip turǵan tusta qoǵamdaǵy qysymǵa qaramaı, mektep ashyp, oqýlyq jazýynyń ózi úlken erlik. Biz mektep muǵalimderi men jastarǵa Ybyraıdyń aǵartýshylyq qyryn ashýǵa tyrystyq, -deıdi dramatýrg.

Al, qoıýshy rejıser Farhadbek Qanafın «17» jastar teatrymen ekinshi márte shyǵarmashylyq baılanys ornatyp otyr. Buǵan deıin «Tastamashy meni ana» spektaklin sahnalaǵan.
— Kórermendi HİH ǵasyrǵa jetelep, qazaq dalasyna Y. Altynsarınniń ilim-bilimdi qandaı eńbekpen ákelgenin, onyń mısıonerlermen kúresin kórsetýge kúsh saldyq, - deıdi F. Qanafın.

Qoıylym premerasy anshlagpen ótti. Ybyraıdyń tatar tilindegi oqýlyqtan bas tartyp, qazaqtyń bolmysyna saı kitap jazýy, bilim taratý jolyndaǵy kúresi kórermenderge oı saldy.

Aıta keteıik, «17» jastar teatry 2018 jyly qurylǵan. Repertýarynda onǵa jýyq spektakli bar teatr, «Ybyraıdy» respýblıkanyń túkpir-túkpirinde sahnalaýdy josparlap otyr.

Zamıra Aldabergenova
Sýretti túsirgen Serik Qosaev.