QR Úkimetiniń búgingi otyrysynda elimizdiń Ekologıa, geologıa jáne tabıǵı resýrstar mınıstri Serikqalı Brekeshov habarlama jasap, atmosferalyq aýasy lastanǵan on qalany atap ótti. Selektorlyq rejımde ótken Úkimet otyrysyna Shymkent qalasynyń ákimi Murat Áıtenov qatysty.

Qalalar ekologıasyn jaqsartýda «Jasyl qala» Ulttyq jospary sheńberinde iri óndiris oryndarynyń aýa lastaý deńgeıin tómendetý, eldi mekenderge tabıǵı gaz tartý, sharýashylyq sýbektilerdi gazǵa kóshirý, qoǵamdyq kólikterdi suıyq gazǵa kóshirý jumystary atqarylýda.

Zańsyz qoqys oryndaryn joıý mindeti boıynsha bıyl Shymkent qalasynda 47 oryn anyqtalyp, beı-bereket qoqys oryndaryn joıý jumystary 100%-ǵa oryndalǵan. Bul kórsetkish jóninen qalamyz respýblıkada aldyńǵy qatarda.

«Aqtas-1» eldi mekenindegi polıgon janynan qatty turmystyq qaldyqtardy energetıkalyq kádege jaratý kásiporny ashylmaq. «Tassaı-2» eldi mekenindegi karer ornyn qalpyna keltirý jumystary bastaldy.

Buryńǵy qurylys qaldyqtary polıgonynyń ornyna aýmaǵy 4,48 ga. bolatyn jańa saıabaq salyndy. «Jasyl beldeý» qalyptastyrýda bıyl 155 myńnan astam aǵash egildi. Jan basyna shaqqanda jasyl jelek qoryn standartqa sáıkestendirýde 2025 jylǵa deıin jańadan 23 gúlzar ashylady. Qalanyń kógal aýmaǵy 30,25 gektarǵa artady.

Qalanyń gıdrojúıelerin damytý sheńberinde Jol kartasy ázirlenip, júzege asyrylýda. Aýanyń lastaný deńgeıin baqylaýda «Qazgıdromet» uıymynyń 6 stansıasy ornatylǵan. Ekologıalyq monıtorıń júıesin jetildirýde bıyl 10 aýany avtomatty baqylaý stansıalary ornatylady.

Qala ákimi májilis qorytyndysymen qalanyń ekologıalyq ahýalyn jaqsartý, óndiris, qurylys qaldyqtaryn joıý, jasyl jelek qoryn ulǵaıtý, tazalyq saqtaýda qoǵamdyq sanany ózgertý baǵyttary boıynsha sala jetekshilerine naqty tapsyrmalar júktep, olardyń oryndalýyn qatań baqylaýda ustaıtynyn eskertti.