16 qarasha kúni Armenıa men Ázerbaıjan shekarasynda iri qaqtyǵys bolyp, sonyń saldarynan eki jaqta da qaza taýyp, jaralanǵandar bar, dep habarlady  Haqqin.az aqparat agentti.

Ázerbaıjan qorǵanys mınıstrligi óz kezeginde Armenıa qarýly kúshterin shekaradaǵy jaǵdaıdy ýshyqtyrý maqsatynda "taǵy bir arandatý áreketin" jasady dep aıyptap otyr.

"Ázerbaıjannyń qarýly kúshteri shuǵyl áskerı operasıa júrgizdi" dep habarlady Ázerbaıjan qorǵanys mınıstrliginiń baspasóz qyzmeti.

"Birinshiden, jaýdyń qozǵalysy shekteldi, qarsylastyń kúshteri men quraldaryna zıan keltirildi. Qabyldanǵan sheshýshi sharalardyń nátıjesinde armán áskerleri qarýsyz qalyp ustaldy, ártúrli qarý-jaraqtary alyndy. Aýqymdy arandatýshylyq arqyly qysqa merzimde jeńiske umtylǵan armán áskerı bólimsheleriniń shabýyly, jedel-taktıkalyq turǵydan tolyq sátsizdikke ushyrady, al resmı Erevannyń arandatýshylyqqa barýdaǵy kezekti áreketi sátsiz aıaqtaldy", dep jazady haqqin.az portaly.

Reseı Qorǵanys mınıstrligi soǵys mınıstri Sergeı Shoıgý men onyń armán jáne ázerbaıjan áriptesteriniń telefon arqyly sóılesýiniń nátıjesinde taraptar shaıqasty toqtatqany habarlandy.

Armenıa premer-mınıstri Nıkol Pashınán seısenbi kúni keshke Armenıa-Ázerbaıjan shekarasy qazir salystyrmaly túrde tynysh ekenin, biraq jaǵdaı shıelenisip turǵanyn aıtqan.

Reseı prezıdenti Vladımır Pýtınmen telefon arqyly sóılesken Pashınán shekaradaǵy sońǵy oqıǵalardy egjeı-tegjeıli baıandap, "Ázerbaıjan kúshteriniń áreketi Armenıaǵa qarsy agresıadan basqa eshteńe emes" dep jetkizdi.