Shymkent qalasynda bıyl «Nurly jer» memlekettik baǵdarlamasy aıasynda 25 kóppáterli turǵyn úıge kúrdeli jóndeý jumystaryn júrgizý qarastyrylǵan. Nátıjesinde eskirgen úılerdiń shatyry men ınjenerlik komýnıkasıa júıeleri jańartylyp, jertóleleri kúrdeli jóndeýden ótýde.

Qala ákiminiń orynbasary Erǵalı Bilisbekov kúrdeli jóndeýden ótip jatqan úılerdi aralap, turǵyndarmen kezdesti. Jangeldın kóshesindegi shırek ǵasyrdan asa ýaqyt jóndeý jumystary júrgizilmegen №12 A úı tolyǵymen qaıta jańǵyrtylyp otyr. Erǵalı Dáýletbekuly aralaý barysynda jaýapty sala jetekshileri men jóndeý jumystaryn júrgizip jatqan mekeme qyzmetkerlerine birqatar tapsyrma berdi.

- Eń bastysy halyqtyń jaılylyǵy úshin kúrdeli jóndeý jumystarynyń barlyq talapqa saı sapaly da qaýipsiz bolýy mindetti. Halyq zardap shekpeýi kerek. Ár isti óz úılerińizge jasaǵandaı oryndańyzdar. Biz úshin turǵyndardyń kelisimi men rızashylyǵynan mańyzdy eshteńe joq,- dedi qala basshysynyń orynbasary.

Qarasý shaǵynaýdanyndaǵy №82 úıdiń tóraıymy Valentına Bondarenko turǵyn úıdiń qaıta jańǵyrtylyp, ábden tozyǵy jetken jerleriniń jańartylǵanyna qýanyshty. Ol kóp jaǵdaıda ortańǵy qabatta turatyn azamattar jertóle nemese shatyrdyń jóndeý jumystaryna qatysqylary kelmeıtindigin, komýnaldyq júıe isten shyǵyp, shatyrdan sý ótse jóndeý jumystary búkil úı turǵyndaryna ortaq sharýa ekenin túsingisi kelmeıtinder de bar ekenin aıtty.

Kúrdeli jóndeý jumystary úshin jergilikti búdjet esebinen qarajat bólinip, qaıtarymdy negizde júrgizilýde. Erǵalı Bilisbekov jaýapty sala mamandaryna kelesi jyly kúrdeli jóndeý jumystaryn jyl sońyna qaldyrmaı erte aıaqtaýdy tapsyrdy.