Búgin Ál-Farabı atyndaǵy qalalyq ǵylymı-ámbebap kitaphanasynda «Shymkent qalasynyń ensıklopedıasy» kitabynyń qurastyrylýyna oraı keńes jıyn ótti. Jıynǵa Shymkent qalalyq máslıhatynyń hatshysy B.Narymbetov, OQMÝ rektory G.Súgirbaeva, jazýshy M.Baıǵut, ensıklopedıany qurastyrýshy redaktor, jazýshy M.Ábdákimuly jáne ózge de zıaly qaýym ókilderi qatysty.

Ensıklopedıany qurastyrýdaǵy maqsat - Shymkent qalasynyń kóne zamandardan bastap búginge deıingi tarıhı jáne aıtýly kezeńderin, kıeli jerleri men eskertkishterin, oqý-aǵartý, mádenıet, óndiris, jol qurylysy, ónerkásip, qalaǵa eńbegi sińgen azamattar men qoǵam qaıratkerleriniń, aqyn-jazýshylardyń, ǵalymdardyń, óner adamdarynyń, eńbek ozattarynyń, sportshylar men sýretshilerdiń ómirbaıandary, Táýelsizdik jyldaryndaǵy ákimder men ákimshilik qyzmetkerleriniń, aýdan ákimderiniń, jetken jetistikter men qala kóleminde iske asqan ózgerister, jańalyqtarmen tanystyrý.

M. Ábdákimuly jospar boıynsha ensıklopedıa qala tarıhynan bastalatynyn, tarıhty kezeń-kezeńimen bergen soń, ózge málimetter alfavıttik negizde usynylatynyn jetkizdi.

Keńes barysynda uıymdastyrý alqasynyń músheleri jaryqqa shyqqaly otyrǵan ensıklopedıaǵa enetin málimetter, tulǵalar jaıynda jáne jalpy materıaldar týraly pikirler men usynystaryn ortaǵa saldy.