Aqtóbede oblys ákimdiginiń qoldaýymen oblystyq mádenıet, arhıvter jáne qujattama basqarmasy, Halyq shyǵarmashylyǵy ortalyǵynyń uıymdastyrýymen ult ónerin ulyqtaý jolyndaǵy «Edige degen er eken» atty respýblıkalyq jyrshylar baıqaýy bastaldy. Oǵan Mańǵystaý, Qyzylorda, Jambyl, Batys Qazaqstan, Aqtóbe oblystary men Nur-Sultan jáne Almaty qalalarynan 18 úmitker qatysýda.

Baıqaýdy erekshe ónerimen álemdi moıyndatqan «Turan» etno-folklorlyq ansambli "Uly Turan - máńgilik", "Qara jorǵa"  kompozısıalarymen ashty. Óner dodasynda qazylar alqasyna Mańǵystaý oblystyq ǵylymı-ádistemelik, mádenı qyzmet kórsetý ortalyǵynyń mamany, jyrshy-jyraý Eldos Emil tóraǵalyq etti.

Quramynda Qyrǵyzstan Respýblıkasynyń manasshysy, Manas Ordo Ulttyq kompleksiniń ǵylymı qyzmetkeri Kamıl Mamadalıev, Jambyl atyndaǵy Qazaq memlekettik fılarmonıasynyń dırektory, QR Mádenıet salasynyń úzdigi, mýzykant-mýltıaspapshy Serik Nurmoldaev, Aqtóbe oblysynyń mádenıet, arhıvter jáne qujattama basqarmasynyń basshysy Altynaı Iýnısova, jyraý, «Er Edige» jyr mektebiniń ustazy Ádilbek Sarın syndy qazylar alqasy jyrshylardyń oryndaýshylyq sheberligine, sahna mádenıeti men jyrdyń syryn kórermenge jetkize bilý, kásibı deńgeılerine qarap baǵa beredi.

Baıqaý talabyna saı alǵashqy kezeńde qatysýshylar Bataqtyń Sarysy, Shernıaz Jarylǵasuly, Aqtan Kereıuly, Ábýbákir Kerderi, Nurpeıis Baıǵanındeı ánshi-jyraýlar men halyq kompozıtorlarynyń shyǵarmalaryn oryndasa, al ekinshi kezeńde «Edige» jyrynan úzindi (Sh.Ýálıhanov, Muryn jyraý, Nurtýǵan nusqalary) jyrlap, erkin taqyrypta da óner kórsetedi.