14-15 qazan kúnderi Aqtóbe qalasynda "Ádebıet. Rýh. Qoǵam" atty respýblıkalyq ádebı forým ótti. Forým bizdiń óńirde úshinshi jyl qatarynan ótkizilip keledi.
Onyń jumysyna belgili aqyndar men jazýshylar – Qazaqstan Respýblıkasy Jazýshylar odaǵynyń tóraǵasy Ulyqbek Esdáýlet, aqyn Elena Ábdihalyqova, aqyn Baýyrjan Jaqyp, QR Jazýshylar odaǵynyń múshesi Mereke Qulkenov, kompozıtor Qurmanáli Qaldybek, mádenıet jáne sport mınıstrliginiń ókilderi jáne t.b. qatysty.
"Men sizderdi Qazaqstan Respýblıkasy Táýelsizdiginiń 30 jyldyǵyn merekeleý qarsańynda, "Rýhanı jańǵyrý" baǵdarlamasy aıasynda uıymdastyrylǵan dástúrli "Ádebıet. Rýh. Qoǵam" forýmynda kórgenime qýanyshtymyn. "Alash" qozǵalysynyń kóshbasshysy Ahmet Baıtursynovtyń "óz tilinde sóıleıtin jáne óz ádebıeti bar halyq qana derbes ómirge úmitker bola alatynyn eshqashan umytpaýymyz kerek" degen sózin este ustasaq, forýmnyń basty maqsaty qazaq ádebıetinde eleýli iz qaldyrǵan Aqtóbe óńiriniń kórnekti tulǵalarynyń esimderin tanymal etý. Sondaı - aq jańa talanttardy anyqtaý bolyp tabylady", - dedi oblys ákimi Ońdasyn Orazalın forýmnyń ashylýynda.
Óńir basshysy sońǵy jyldary Aqtóbe oblysynda qazaq mádenıeti men ádebıetin nasıhattaý jáne dáripteý boıynsha júzege asyrylǵan jobalarǵa qysqasha toqtaldy. Aqtóbede Altyn Orda dáýiriniń qolbasshysy jáne memleket qaıratkeri Er Edigeniń, uly oıshyl Abaı Qunanbaevtyń eskertkishteri ashyldy. Kıeli nysandar, onyń ishinde Abat Baıtaq, Han molasy, Dosjan haziret keseneleri qalpyna keltirildi. Eki jyl buryn Temir aýdanyndaǵy Tasqopa qorymynan tabylǵan Altyn adamnyń kıimderi qalpyna keltirildi. Belgili ǵalymdar men qoǵam qaıratkerleriniń qatysýymen ǵylymı-praktıkalyq konferensıalar ótkizildi. Aqtóbe oblysynan shyqqan ataqty aqyndar men jazýshylardyń úzdik shyǵarmalarynyń jınaǵy shyǵaryldy.
Aıta keteıik, eki kúndik forým aıasynda "Edige degen er eken" atty respýblıkalyq jyrshylar baıqaýy, Tabyldy Dosymov atyndaǵy bard ánderin oryndaýshylardyń respýblıkalyq konkýrsy jáne basqa da is-sharalar ótti.
Sonymen qatar, búgin respýblıkalyq ádebı baıqaýdyń 10 nomınasıa boıynsha jeńimpazdary marapattaldy. Olarǵa Tólegen Aıbergenov, Saǵı Jıenbaev, Ótejan Nurǵalıev, Tobyq Jarmaǵambetov, Qajyǵalı Muhambetqalıuly, Tahaýı Ahtanov, Bákir Tájibaev, Úmbetbaı Ýaıdın, Qýandyq Shańǵytbaev, İztaı Mámbetov sıaqty shyǵarmalary qazaq ádebıetiniń klasıkasyna engen kórnekti aqtóbelik aqyndar men jazýshylar atyndaǵy stıpendıalar tabys etildi.
Sonymen birge, kompozıtor Shámshi Qaldaıaqov pen aqyn Tólegen Aıbergenovke arnalǵan eskertkishterdiń ashylý saltanaty ótti. Oǵan Shámshi Qaldaıaqovtyń ápkesi Raıhan Dombaeva jáne aqyn Tólegen Aıbergenovtiń qyzy Mahabbat Aıbergenova qatysty.
