14 qazan, beısenbi kúni, oblys ákimi Ońdasyn Orazalın Aqtóbe qalasyn abattandyrý jáne ınfraqurylymdyq damýy boıynsha birqatar jobalardyń júzege asyrylýymen tanysty.

Jumys sapary Nur Aqtóbe turǵyn úı alabyndaǵy órt sóndiretin avtokólik quraldaryna arnalǵan turaq – garajdyń qurylys barysymen tanysýdan bastaldy.

«Qala aýmaǵy ekpindep úlkeıip keledi, sonyń ishinde qazirgi tańda Qarǵalyda ornalasqan órt sóndirý bólimi qyzmet kórsetetin Nur Aqtóbe turǵyn úı alaby da bar. Bul jer aıtarlyqtaı qashyq, biz úlgermeımiz, sondyqtan órt sóndirý beketin ashý qajettiligi týdy»,- deıdi Tótenshe jaǵdaılar departamenti basshysynyń mindetin atqarýshy Qaırat Qasymov.

Órt sóndirý beketi bir ýaqytta eki jerge shyǵýǵa eseptelgen, jeke quram 100 % jasaqtalǵan.

«Ákimdik qoldaýynyń arqasynda jyl sońyna deıin 33 birlik tehnıka satyp alynatyn bolady, onyń 11 birligi ákelinip qoıyldy. Merdiger jyl sońyna deıin osy nysannyń qurylysyn aıaqtaýdy mindetine aldy, sonymen birge, Nur Aqtóbeniń qazandyǵy turǵan jerde mamandandyrylǵan órt sóndirý bólimi salynyp jatyr.

Órt sóndirý bóliminiń qurylysy aıaqtalǵan soń bul beket garnızonnyń barlyq tehnıkasyna arnalǵan jóndeý bazasy bolady. Bul biz úshin óte mańyzdy, nysan qatty kerek»,- dedi óńir basshysyna jobanyń júzege asyrylý barysy jaıynda baıandaǵan Qaırat Qasymov.

Keıin Ońdasyn Orazalın Nur Aqtóbedegi kópqabatty turǵyn úılerdiń qurylys barysyn qarap shyqty.

«Aqtóbe Sáýlet» JSHS bas dırektory Arnur Ahmadıuly eki toǵyz qabatty úıdi paıdalanýǵa berý jumystary týraly baıandady.

«Úıler 72 páterli. Olardyń jartysy – eki bólmeli, qalǵan jartysy – úsh bólmeli. Jalpy aýmaǵy 5 myń m2. Jyl sońyna deıin tapsyramyz. Qurylys materıaldaryn qarjylandyrý men jetkizýge baılanysty problema joq»,- dedi óńir basshysynyń suraqtaryna jaýap bergen A.Ahmadıuly.

Bıyl oblys boıynsha barlyǵy 1,1 mln m2 baspana turǵyzylmaq. Ótken 9 aıda 624,8 myń m2 nemese 4 250 páter paıdalanýǵa berildi. Qazirgi tańda oblys boıynsha 6 nesıeli jáne 11 jaldamaly-kommýnaldyq kóppáterli úılerdiń qurylysy jalǵasýda.

Oblys ortalyǵyndaǵy, sonyń ishinde qala ortalyǵynan alys jerler men jańa turǵyn úı alaptaryndaǵy qoǵamdyq keńistikterge erekshe nazar aýdarylady. Nur Aqtóbe turǵyn úı alabynyń 1 shaǵyn aýdanynda úlken gúl baǵyn salý bastaldy. Jyl sońyna deıin jaıaýjol plıtkalary tóselip, jaıaýjúrginshiler joldary, jaryq, sýarý júıesi, balalarǵa arnalǵan jáne sport alańdary, kúrke jáne t.b. ornatylady. Jaryn komýnaldyq qyzmetter gúl baǵyn kógaldandyrý jumystarymen aınalysatyn bolady.

Oblys ákimi eski qaladaǵy gúl baqtary men aleıalardy qalpyna keltirý jumystaryn qarap shyqty.

«Ahtanov sharshysyn» qalpyna keltiremiz, bul – Qobylandın kóshesi boıyndaǵy gúl baǵy, Shernıaz kóshesiniń bir bóligi, sosyn Altynsarın kóshesinen Jangeldın eskertkishine deıingi jer. Qıyrshyq tas tósep, 120 sham ornatamyz, eski qorshaýlardy aýystyramyz, 54 shaǵyn sáýlet formalary men baspaldaqtardy qalpyna keltiremiz»,- dedi “AEMK Jaryq” JSHS merdiger mekemesi dırektorynyń orynbasary Aleksandr Galsev.

Jumystar qazan aıynyń sońyna qaraı aıaqtalady dep josparlanyp otyr.

Qyzmettik sapar Jańaqonys turǵyn úı alabyndaǵy Almaty kóshesi boıyndaǵy joldyń jóndeý jumystarymen tanysýmen jalǵasty.
Osy jyly Jańaqonysta Sovetskaıa kóshesiniń 2 shaqyrym jáne Almaty kóshesiniń 2,3 shaqyrym jolyn jóndeý bastaldy. Joba jalǵasýda - bıyl asfált tósemniń birinshi qabaty tóseldi. Jumystar keler jyly tolyq aıaqtalady dep josparlanyp otyr.

Oblys ákimi sondaı-aq, Táýelsizdiń dańǵyly boıyndaǵy «Azattyqtyń aq tańy» keshenine arnalǵan oryndy qarap shyqty.

Qyzmettik sapar sońynda oblys ákimi aýlasy bar aýmaqtardyń abattandyrylýymen tanysty. Ol Ábilqaıyr han dańǵyly men Aldıarov kóshesi boıyndaǵy birqatar aýlalarǵa baryp, jergilikti turǵyndarmen tildesti.

«Bizge qatty unaıdy. Aýlamyzdyń jańartylyp, balalar alańynyń ornatylǵany qýantady, qazir asfált tósep jatyr, bordúrlar ornalastyryp jatyr. Osylaı jalǵastyra berińizder – sol kezde qalada bári jaqsy bolady»,- dedi qala turǵyny Vácheslav Sýhonosov.
Osy jyldyń qorytyndysy boıynsha oblys ortalyǵynda 220 aýla jóndelip, balalar oınaıtyn 67 alań ornatylady, 9 saıabaq pen gúl baǵy qalpyna keltiriledi.

Sapar sońynda oblys ákimi qala basshylyǵyna oblys ortalyǵyn ári qaraı abattandyrý men júzege asyrylyp jatqan jobalardy ýaqytynda aıaqtaýǵa qatysty birqatar naqty tapsyrmalar berdi.