«Nur Otan» partıasy Tóraǵasynyń Birinshi orynbasary Asqar Myrzahmetov bastaǵan delegasıasynyń Qytaı Halyq Respýblıkasyna resmı sapary barysynda «Nur Otan» men Qytaı Komýnıstik partıasynyń arasynda 2015-2017 jyldarǵa arnalǵan partıaaralyq yntymaqtastyq týraly Hattamaǵa qol qoıyldy. bul týraly "Qamshy portaly Baq.kz-ke silteme jasaı otyryp habarlaıdy.
Qytaı Halyq Respýblıkasyna jýyrda jasaǵan sapary barysynda Elbasy, «Nur Otan» partıasynyń Tóraǵasy N.Á.Nazarbaev eki el arasynda barlyq salada, ásirese saıası-ekonomıkalyq máseleler boıynsha yntymaqtastyqty nyǵaıtýdyń mańyzdylyǵyn aıtyp ótti.
Osyǵan oraı, Qytaı eliniń jetekshi saıası kúshi – Qytaı Komýnıstik partıasymen ózara áriptestikti odan ári jetildirý maqsatynda 17 qyrkúıekte «Nur Otan» partıasy Tóraǵasynyń Birinshi orynbasary Asqar Myrzahmetov bastaǵan «Nur Otan» partıasynyń delegasıasy Qytaı Halyq Respýblıkasyna resmı saparmen keldi. Beıjiń qalasynda Qytaı Komýnıstik partıasynyń basshylyǵymen ótken ekijaqty kezdesý barysynda qos bıleýshi partıanyń arasynda yntymaqtastyq týraly 2015-2017 jj. arnalǵan Hattamaǵa qol qoıyldy.
Sapar barysynda «Nur Otan» partıasynyń delegasıasy QKP OK Halyqaralyq baılanystar bólimi meńgerýshisiniń orynbasary Chjoý Lı myrzamen kelissózder ótkizdi. Delegasıa quramyna Partıa Hatshysy Farhad Qýanǵanov, QR Parlamenti Májilisiniń depýtaty, Partıa Saıası keńesi Búrosynyń múshesi, Partıalyq baqylaý komıtetiniń tóraǵasy Qýanysh Sultanov, QR Parlamenti Májilisiniń depýtaty, Sybaılas jemqorlyqqa qarsy is-áreket jónindegi Respýblıkalyq qoǵamdyq keńesiniń tóraǵasy Qaıyrbek Súleımenov, partıa Tóraǵasy Birinshi orynbasarynyń keńesshisi Berik Qurmanǵalı, Partıanyń Saıası menedjment mektebiniń dırektory Áset Ábdýalıev kirgen.
Kezdesý nátıjesinde «Nur Otan» partıasy men Qytaı Komýnıstik partıasy arasyndaǵy yntymaqtastyq týraly 2015-2017 jj. arnalǵan Hattamaǵa qol qoıyldy. Odan buryn osyndaı hattamaǵa 2011 jyly qol qoıylǵanyn aıta ketý kerek.
Chjoý Lı myrzamen kezdesý barysynda A.Myrzahmetov 2013 jylǵy qyrkúıekte QHR Tóraǵasy Sı Szınpın Nazarbaev Ýnıversıteti qabyrǵasynda Jibek jolynyń ekonomıkalyq beldeýin qurý týraly tarıhı bastama usynǵanyn eske saldy. Bundaı aýqymdy transkontınentaldy jobanyń júzege asyrylýy oǵan qatysýshy elderdiń turaqty ekonomıkalyq damýyna múmkindik beretinin aıtty.
«Nurly jol» baǵdarlamasy men «Bir beldeý, bir jol» bastamasynyń úılesimdigi eki el arasyndaǵy strategıalyq áriptestikti nyǵaıtý úshin jańa múmkindikter ashady», - dedi A.Myrzahmetov.
«Nur Otan» partıasy Tóraǵasynyń Birinshi orynbasary Qytaı Halyqtyq Saıası Konsýltatıvtik Keńesi Jalpyqytaı Komıtetiniń Tóraǵasy, QKP OK Halyqaralyq baılanystar bóliminiń meńgerýshisi Van Szájýı myrzamen kezdesti. Kezdesý barysynda ekijaqty áriptestik máseleleri talqylanyp, eki eldegi qazirgi jaǵdaı sóz boldy.
Búgingi tańda Qytaı men Qazaqstan arasynda tyǵyz áriptestik ara-qatynas ornaǵany aıtyldy. Syrtqy saýda aınalymy boıynsha Qytaı Qazaqstannyń eń iri seriktesine aınalǵany jáne onyń Qazaqstannyń jalpy taýar aınalym kólemindegi úlesi 20%-ǵa jetkeni sóz boldy. Sońǵy jyldyń ózinde eki el basshylary tórt ret kezdesken. N.Á.Nazarbaevtyń jýyrda ótken Qytaıǵa sapary barysynda 33 qujatqa qol qoıylǵan, onyń 28-i komersıalyq sıpatqa ıe, jalpy quny 23,5 mlrd.doll.quraıdy.
«Qytaımen ózara dostyq qarym-qatynastar – Qazaqstannyń syrtqy saıasatynyń dástúrli basymdyqtarynyń biri bolyp tabylady. Eki el arasynda dıplomatıalyq baılanystar 23 jyl buryn ornaǵan, osy merzimde Qazaqstan men Qytaıdyń barlyq salalar boıynsha júrgizilip otyrǵan saıası dıalogy ózara dostastyq pen qurmetteýdiń úzdik kórinisine aınalyp otyr», - dep atap ótti «Nur Otan» partıasy Tóraǵasynyń Birinshi orynbasary.
Sapar baǵdarlamasy boıynsha «Nur Otan» partıasynyń delegasıasy sondaı-aq Qytaı Halyqtyq Ókilderi Jalpyqytaı Jınalysy Turaqty Komıtetiniń Tóraǵasy Chjan Deszán myrzamen kezdesti.
Kezdesý barysynda A.Myrzahmetov «Nur Otan» men QKP óz elderinde bıleýshi partıalary bolyp tabylatynyn atap ótti. Sonymen birge eki partıany biriktiretin birqatar qundylyqtary men jumys baǵyttaryn da aıta ketti. Mysalǵa, eki jaq daǵdarystan keıingi damý jónindegi memlekettik baǵdarlamalardyń oryndalýyn qadaǵalaý, ınfraqurylymdy jańǵyrtý, sybaılas jemqorlyqqa qarsy is-áreket jónindegi ınstıtýsıonaldy ortany nyǵaıtý jáne t.b. máselelerge aıryqsha nazar aýdarady.
Memleket basshysy, partıa Tóraǵasy N.Á.Nazarbaevtyń tapsyrmasymen «Nur Otan» eldiń basty baǵdarlamalyq qujattary – Bes ınstıtýsıonaldy reforma, «Nurly jol» baǵdarlamasy, «100 naqty qadam» Ulttyq josparyn iske asyrýǵa tikeleı qatysatyny da aıtyldy. Sondaı-aq partıa Tóraǵasynyń Birinshi orynbasary Qytaı men Qazaqstannyń ózara tıimdi seriktestigin nyǵaıtýǵa múmkindik beretin partıaaralyq áriptestiktiń serpindi damýynyń mańyzdylyǵyna aıryqsha toqtaldy.
