OQO ákimi Beıbit Atamqulovtyń jumys sapary Otyrar aýdanynda jalǵasty. Aımaq basshysy aldymen Shilik aýylyndaǵy «Jańa - jer» sharýa qojalyǵynyń jumysymen tanysty. Bul týraly "Qamshy" portaly Aıqynǵa silteme jasaı otyryp habarlaıdy.
Onda et, sút, shubat, jumyrtqa sekildi ónimniń tórt túri óndiriledi. Sharýa qojalyqtyń tóraǵasy J.Qudiretýllaev málimdegendeı, munda táýligine 5 tonna sút ónimderi, 150 lıtr shubat, 3 tonna eti ónimderi men bes myń danaǵa jýyq jumyrtqa óndiriledi.
Sharýashylyqta 35 adam jumyspen qamtylǵan. Budan soń óńir basshysy Shilik aýyl okrýgindegi S.Qurtaev atyndaǵy shaǵyn jınaqty mektebin aralap kórip, jańa oqý jylyn bastaǵan oqýshylarǵa oqýda ozat bolýlaryn aıtty.
B.Atamqulov Temir aýyl okrýgindegi «Otyrar-Dán» júgeri keptirý jáne saqtaý kesheniniń jumysyn aralap, ındýstrıaldy aımaq pen jańa júgeri óńdeý zaýyty qurylysynyń jobasymen tanysty. Kásiporyn jylyna 10 myń tonnaǵa deıin júgeri dánin keptirip, saqtaýǵa qaýqarly. Munda jergilikti 35 adam jumyspen qamtylǵan. Oblys ákimi Otyrar aýdanynyń Kókmardan aýylyna da at basyn burdy. Mundaǵy «Úsenov N.» SHQ taýarly sút fermasy jáne sút óńdeý kásipornynyń ekologıalyq taza shubaty, bıo shubaty, pasterlengen túıe sútimen tanysty. «Túıe sútin óńdeý» jobasy 2012 jyly ÚIID memlekettik baǵdarlamasy aıasynda iske qosylǵan. Kúndigine 5 myń tonnaǵa deıin sút ónimderin shyǵarýǵa múmkindigi bar sharýa qojalyǵy jylyna 500 tonna túıe sútin óńdep, daıyndaıdy.
Búgingi tańda daıyn ónimder Shymkent qalasynan bólek, Almaty, Astana qalalaryna shyǵarylyp satylýda. Qazirgi kúni qojalyq basshysy túıe sútin untaqtap shyǵarý jumystaryn qolǵa alǵan. Ejelgi qalaǵa jasaǵan saparynda oblys ákimi kóne jazbalar men qundy jádigerler saqtalǵan «Rýhanıat-Ábý Nasyr Ál-Farabı» atyndaǵy murajaıǵa bardy. Onda aımaq basshysy murajaıdyń tynys-tirshiligimen tanysyp, bir ǵasyrdan beri saqtalyp kele jatqan «Kóroǵly» dastanyn kórdi. Rýhanı mádenıeti damyǵan aýdanda atqarylǵan jumystardy saralaǵan oblys ákimi áleýmettiń áleýetin kóteretin jańa jobalardy iske asyrý qajettigin aıtty, dep habarlady OQO ákiminiń baspasóz qyzmetinen.
QazAqparat
