Búgin Ortalyq komýnıkasıalar qyzmetiniń alańyndaǵy baspasóz máslıhatynda Energetıka mınıstrliginiń Atom jáne energetıkalyq qadaǵalaý men baqylaý komıteti tóraǵasy Suńǵat Esimhanov elimizdegi jylytý júıesi men elektr stansıalarynyń otyn qoımalarynda 3,4 mln tonna kómir men 112 myń tonna mazýt jınalǵandyǵyn atap ótti. Bul týraly "Qamshy" portaly Baq.kz –ke silteme jasaı otyryp habarlaıdy.
- Qazirgi kezde elimizdegi jylytý júıesi men elektr stansıalarynyń otyn qoımalarynda 3,4 mln tonna kómir men 112 myń tonna mazýt jınaldy. Bul jalpy kólemniń basym bóligin quraıdy. Júz paıyzdyq deńgeıde bolmasa da, sol kórsetkishke jeteqabyl. Al endi JEO-da otyn daıyndaý jartymsyz qarqynmen júrgizilip jatqan mekemelerge keler bolsaq, onyń biri – Kentaý qalasy bolyp otyr. Mysaly, qalypty jaǵdaı 16 myń tonna bolsa, jetkiliksiz otynnyń kólemi 4 myń tonnany quraýda. Sol sekildi Semeı men Arqalyq qalalaryndaǵy jaǵdaı da osy shamalas, - dedi Suńǵat Qýatuly.
Aıta keteıik, aǵymdaǵy jylda kestege sáıkes 9 blog pen 59 qazandyqqa jáne 47 týrbınaǵa kúrdeli jóndeý josparlanǵan bolsa, qazirgi kezde elektr stansıalarynyń 5 blogy (jyldyq kólemniń 55 paıyzy) men 38 qazandyqqa (jyldyq kólemniń 64 paıyzy) jáne 26 týrbınaǵa (jyldyq kólemniń 55 paıyzy) jóndeý jumystary júrgizilgen.
- Sondaı-aq, tap osy kúnderi 3 blog pen 18 qazandyq jáne 16 týrbınada jóndeý júrgizilý ústinde. Tutastaı alǵanda barlyq jumystar josparǵa sáıkes júzege asyrylýda dep aıtýǵa bolady, - dedi komıtet tóraǵasy.
