«Nur Otan» Tóraǵasynyń Birinshi orynbasary Baýyrjan Baıbek Taldyqorǵan qalasyna sapary barysynda partıanyń Almaty oblystyq fılıalynyń kezekten tys konferensıasyna qatysty. Partıa fılıalynyń jańa tóraǵasy retinde delegattar óńir ákimi Qanat Bozymbaevty saılady.

Partıa Tóraǵasy birinshi orynbasarynyń aıtýynsha, Qanat Bozymbaev buǵan deıin Jambyl jáne Pavlodar oblystarynda partıany tabysty basqarǵan. Fılıal jańa basshylyǵynyń aldynda partıanyń saılaýaldy mindettemelerin odan ári sapaly oryndaý, qoǵamdyq keńesterdiń jumysyn jandandyrý jáne halyqpen keri baılanysty nyǵaıtý mindetteri tur.

«Saıası keńestiń keńeıtilgen otyrysynda Elbasy, partıa Lıderi Nursultan Nazarbaev aıtqandaı, «Qazaqstan Táýelsizdiktiń tórtinshi onjyldyǵyna qadam basýda. Bul aýqymdy ózgeristerge, qıyn da jaýapty sheshimderge toly kezeń bolary anyq». Mundaı jaǵdaıda bıleýshi partıa retinde «Nur Otan»-ǵa eldegi sabaqtastyq, saıası turaqtylyq jáne odan ári damýdy qamtamasyz etetin el Prezıdenti Qasym-Jomart Toqaevtyń memlekettik baǵyty tóńireginde qoǵamdy toptastyrý jónindegi erekshe mindet júktelgen», – dep atap ótti Baýyrjan Baıbek.

Sondaı-aq, ol konferensıada «Nur Otan» Saıası keńesi Búrosynyń sheshimimen «Belsendi qyzmeti úshin» partıalyq nagradasymen marapattalǵan fılıaldyń burynǵy tóraǵasy Amandyq Batalovqa atqarǵan jumysy úshin alǵys bildirdi.

Osy kúni Baýyrjan Baıbek partıanyń «Ózgerister joly: Ár azamatqa laıyqty ómir!» saılaýaldy baǵdarlamasyn júzege asyrý aıasynda ashylǵan birqatar áleýmettik nysandardy aralady.

Ol oblystaǵy Oqýshylar saraıyna baryp, onda 140-tan astam balaǵa 3D jáne ınteraktıvti modelderdi jasaý, baǵdarlamalaý, qurastyrý daǵdylaryn úırenýge múmkindik beretin jańa «FAB LAB» ınovasıalyq zerthanasynyń jumysymen tanysty.

Budan soń partıa Tóraǵasynyń birinshi orynbasary Áıelder kásipkerligin damytý ortalyǵyna bardy. Onda isin jańa bastaǵan jáne jumys istep júrgen kásipker áıelder jeńildikpen nesıe alý, satý naryǵyn keńeıtý, bıznes-jobalardy iske asyrýda tájirıbelik kómek alý sıaqty t.b. máseleler boıynsha keńes alýyna bolady.

«Jalpy, partıa saılaýaldy baǵdarlamasyn júzege asyrýdyń 11 aıdaǵy qorytyndysy boıynsha óńirde 1 mıllıon sharshy metrge jýyq turǵyn úı, 12 mektep paıdalanýǵa berilip, 538 km jol salyndy jáne jóndeldi, 27 myń turaqty jumys orny ashyldy jáne t.b. Osyndaı jumystardy partıa elimizdiń barlyq óńirlerinde júrgizip jatyr», – dep jazdy ol saparynyń qorytyndysy týraly Facebook-tegi paraqshasynda.