AQSH prezıdenti Djo Baıden beısenbi kúni Qytaıdyń Shyńjań aımaǵynda óndiriletin ónimderge tyıym salatyn jańa zańǵa qol qoıdy.
Amerıka Qurama Shtattary Kongresiniń músheleri usynǵan zań osy aıdyń basynda Ókilder palatasynda da, Senatta da biraýyzdan maquldanǵan jáne zań jobasy Aq úıge jiberilgen. AQSH prezıdenti Djo Baıden oǵan qol qoıatynyn aıtqan. Bul – "Beıjińniń Shyńjańdaǵy uıǵyr, qazaq sıaqty musylman azshylyǵyna jasaǵan qatal saıasatyna qarsy Vashıngtonnyń jaýaby" dep sanaldy.
Zań jetkizýshilerden ónimderiniń májbúrli eńbekpen jasalmaǵanyn dáleldeýdi talap ete otyryp, Shyńjańnan AQSH-qa taýarlardy ımporttaýǵa jappaı tyıym salady. Shyńjań maqta men kún panelderiniń iri jetkizýshisi bolyp esepteledi.
Birikken Ulttar Uıymynyń sarapshylary men quqyq qorǵaý toptary sońǵy jyldary Shyńjańdaǵy lagerler júıesinde bir mıllıonnan astam uıǵyr, qazaq, qyrǵyz sıaqty azshylyqtardyń túrmede otyrǵanyn málimdeıdi. AQSH pen kóptegen quqyq qorǵaý uıymdary muny "genosıd" dep atady.
Jańa zań boıynsha, Shyńjańdaǵy májbúrli eńbekke jaýapty dep anyqtalǵan kez kelgen adamǵa sanksıa salynady. Bul Qytaıdan materıaldar alatyn keıbir AQSH kompanıalary úshin jetkizý tizbegin qıyndatady.
Baıden ákimshiligi sondaı-aq ótken aptada Beıjińdi "Shyńjańdaǵy az ulttarǵa joǵary tehnologıalyq baqylaýdy kúsheıtip otyr" dep aıyptap, birneshe qytaılyq tehnologıalyq kompanıalarǵa jáne mekemelerge saýda sanksıalaryn salǵan.
Taıaýda Beıjińniń Shyńjańdaǵy qazaq, uıǵyr sıaqty azshylyqtarǵa júrgizgen saıasatyna qarsy Vashıngton sanksıalar jarıalaǵan. Kóp ótpeı AQSH-tyń dinı bostandyqty baqylaıtyn úkimettik komısıasynyń tórt múshesine Beıjiń sanksıa jarıalady.
Sonymen qatar, AQSH, Avstralıa, Ulybrıtanıa jáne Kanada Beıjiń qysqy Olımpıada oıyndaryna dıplomatıalyq boıkot jarıalap, óz mınıstrlerin jibermeıtinin málimdegen.
AQSH prezıdenti Djo Baıden aldyńǵy aıda Beıjiń olımpıadalyq sport oıyndaryna boıkot jarıalaý jospary bar ekenin málimdegen. Keıinirek AQSH Beıjiń Olımıpıadasyna boıkot jarıalaǵan alǵashqy el atandy.
Vashıngtonnyń bul áreketinen kóp ótpeı Beıjiń AQSH-ty aıyptady.
Keıinirek BBC "Beıjiń-2022 boıkotynyń qanshalyqty mańyzy bar" ekeni týraly saraptama maqala jarıalady.
Halyqaralyq uıymdar jáne kóptegen demokratıalyq elder Qytaıdy "Shyńjań avtonomıasynda turatyn uıǵyr, qazaq sıaqty musylman azshylyqtaryna genosıd jasady" dep aıyptaıdy.
Sonymen qatar, Beıjińniń Gonkongtaǵy saıası bostandyqtardy basyp-janshý áreketine qatysty da shıelenis kúsheıe tústi.
Pikir qaldyrý