AQSH prezıdenti Djo Baıden aqpan aıynda Reseı Ýkraınaǵa shabýyl jasaý "yqtımaldyǵy anyq" ekenin aıtty. Bul týraly Ál-Jazıra Aq úıge silteme jasap habarlady.
Aqparatqa sáıkes, Vashıngton daǵdarysty talqylaý úshin BUU Qaýipsizdik keńesiniń ashyq otyrysyn ótkizýge umtylýda.
Aıta keteıik, Kreml negizgi talaptary NATO tarapynan kezekti ret qabyldanbaǵannan keıin daǵdarysty sheshýde "optımızmge negiz az" ekenin málimdegen. Muny batys elderi salmaqty nota retine qabyldaǵany habarlandy.
Reseı sheneýnikteri daǵdarysty toqtatý úshin dıalog áli de múmkin ekenin aıtty, biraq Baıden Máskeý jaqyn bolashaqta Ýkraınaǵa basyp kiretinin aıtyp qatań eskertý jasady.
Aq úıdiń jarıalaǵan aqparatyna sáıkes, Baıdenniń Ýkraına prezıdenti Vladımır Zelenskııge telefon arqyly aıtqan sózderi Vashıngton sheneýnikteriniń biraz ýaqyttan beri aıtyp kele jatqan alańyn kúsheıtken.
"Prezıdent Baıden reseılikterdiń aqpan aıynda Ýkraınaǵa basyp kirý qaýpi anyq ekenin aıtty" dedi Aq úıdiń Ulttyq qaýipsizdik keńesiniń ókili Emılı Horn.
"Ol bul týraly ashyq aıtty jáne biz bul jóninde birneshe aı boıy eskertip kelemiz" dedi ol.
Ýkraına daǵdarysyna baılanysty batys elderi men Reseı arasyndaǵy shıelenis qalaı órbip jatqany týraly qysqasha aqparatty nazarlaryńyzǵa usynamyz:
- "Reseı Ýkraınaǵa basyp kirý úshin syltaý daıyndap jatyr" dep habarlady Ál-Jazıra telearnasy.
- "Reseı Ýkraınaǵa basyp kirýi múmkin" degen qaýip kúsheıgen kezde AQSH-tyń Memlekettik hatshysy Entonı Blınken Eýropaǵa bardy.
- "Barlyq nusqa tys qalmaıdy. Dıplomatıalyq nusqa da". AQSH memhatshysy Eýropaǵa nege bara jatyr?
- Djo Baıden Reseı Ýkraınaǵa shabýyl jasasa, Máskeýdi "apat" kútip turǵanyn eskertti.
- AQSH barlaý agentteri Reseı Ýkraınaǵa qashan shabýyldaýy múmkin ekenin jarıalady.
- Reseı soǵys ushaqtary Kıevke jaqyn Belarýs eline jınaldy.
- Aǵylshyn saıasatkeri Reseı Ýkraınaǵa basyp kiretini sózsiz ekenin jáne shabýyl jaqyn arada bolatynyn málimdedi.
- AQSH, Ulybrıtanıa Ýkraınaǵa qarý-jaraq jiberip jatyr.
- Danıa, Ispanıa, Fransıa jáne Nıderlandy Shyǵys Eýropaǵa joıǵysh ushaqtar men áskerı kemeler jiberýde.
- Reseı yqtımal shabýyl týraly aqparattardy joqqa shyǵardy.
- Germanıa qazirge Ýkraınaǵa qarý-jaraq bermeıtinin aıtty biraq medısınalyq kómek kórsetetinin jarıalady.
- Eki jaq (Batys-Reseı) soǵysqa daıyndyqpen qosa, dıplomatıalyq kelisimge kelýge tyrysýda.
- Fransıa men Germanıa Reseıdi dıalogqa shaqyrdy.
- Reseı, Ýkraına, Germanıa jáne Fransıa dıplomattary kelissóz júrgizdi.
- Batys elderi Ýkraınaǵa shabýyl jasalsa, zardaby aýyr bolatynyn málimdedi.
- AQSH óz azamattaryn Ýkraınadan shyǵyp ketýge shaqyrdy.
- "Biz qalaı bolsa da daıynbyz". NATO Reseıdiń talabyn toıtardy.
- Baıden: Bul – ekinshi dúnıejúzilik soǵystan keıingi eń iri shabýyl bolýy múmkin.
Pikir qaldyrý