Qazaqstan Respýblıkasynyń Ulttyq muraǵatynda qazaq memlekettik jáne qoǵam qaıratkeri, oıshyl, ǵalym, Túrkistan halyqtarynyń kósemi Mustafa Shoqaıdyń 125 jyldyǵyna oraı «Mustafa Shoqaı: Alash arysy» atty qujattyq kórmesi ashyldy. Bul týraly Qamshy portaly QazAqparatqa silteme jasaı otyryp habarlaıdy.

«Kórmede alǵash ret Mustafa Shoqaıdyń ómiri men qyzmetine qatysty Armenıa, Vengrıa, Mysyr, Iran, Qytaı, Polsha, Reseı, AQSH, Túrkıa, Ózbekstan, Fransıa muraǵattary, kitaphanalary men ǵylymı ortalyqtarynan alynyp, Qazaqstan Respýblıkasy Ulttyq muraǵatynyń №83 qorynda saqtalatyn jáne kórnekti qoǵam qaıratkerleriniń jeke qorlarynan alynǵan muraǵattyq qujattardyń túpnusqalary men kóshirmeleri qoıylady», - deıdi Ulttyq muraǵattyń ókilderi.

Muraǵattyń baspasóz qyzmeti atap ótkendeı, Mustafa bastaýysh bilimdi aýylda ata-anasynan alyp, Tashkenttegi orys gımnazıasyn jáne Peterbor ýnıversıtetiniń zań fakúltetin úzdik bitirgen. Mustafa Shoqaı Memlekettik Dýmanyń Musylman fraksıasy Saıası búrosynda Túrkistan halyqtarynyń birden-bir ókili bolǵan. Gýmanıs-oıshyl, demokrat, ensıklopedıalyq bilim ıesi, aǵartýshy Mustafa Shoqaı Orta Azıa men Qazaqstan halyqtary tarıhy men mádenıetiniń joqtaýshysy boldy, aǵylshyn, fransýz, nemis, túrik jáne arab tilderin óte jetik meńgergen. Búkil ǵumyryn ol Orta Azıa men Qazaqstan halyqtarynyń ar-abyroıyn qorǵaýǵa, shyndyq úshin kúreske arnady. Uly Otan soǵysy bastalysymen nasıster Parıjde barlyq aldyńǵy qatarly orys emıgranttaryn tutqyndap, Kompen konslagerine jiberdi. Olardyń ishinde Shoqaı da boldy. Úsh aptadan keıin ony Berlınge ákelip, quramyna tutqyndalǵan keńes túrikteri alynatyn Túrkistan legıonyn basqarýǵa úgittegen. Mustafa Shoqaı 1941 jyldyń 27 jeltoqsanynda osy lagerlerdiń birinde dúnıeden ótti.